October 08, 2023
October 08, 2023
ഡല്‍ഹി: ഗസയില്‍ സംഘര്‍ഷം തുടരുകയാണെങ്കിലും നിലവില്‍ ഇസ്രയേലിലുള്ള ഇന്ത്യക്കാര്‍ സുരക്ഷിതരാണ്. ആശങ്കയുണ്ടെങ്കിലും കഴിഞ്ഞ ദിവസത്തെ ഭയാനക സാഹചര്യം മാറിയെന്ന് ഇസ്രയേലില്‍ ഉള്ള മലയാളികള്‍ വ്യക്തമാക്കുന്നു. അതിര്‍ത്തികള്‍ ഉള്‍പ്പെടെ അടച്ചതിനാല്‍ നാട്ടിലേക്ക് മടങ്ങാന്‍ കഴിയാത്ത സാഹചര്യമാണ് നിലവില്‍ ഉള്ളത്. റോക്കറ്റ് ആക്രമണത്തിന് നേരിയ ശമനമുണ്ടെങ്കിലും സുരക്ഷിത സ്ഥാനങ്ങളില്‍ നിന്ന് പുറത്തിറങ്ങരുതെന്ന് ഇന്ത്യക്കാര്‍ക്ക് കേന്ദ്ര സര്‍ക്കാരും ഇസ്രയേലിലെ ഇന്ത്യന്‍ എംബസിയും മുന്നറിയിപ്പ് നല്‍കിയിട്ടുണ്ട്.
ഇസ്രയേലിലെ സ്ഥിതിഗതികള്‍ കേന്ദ്രം സൂക്ഷ്മമായി നിരീക്ഷിച്ചുവരികയാണ്. സംഘര്‍ഷം തുടരുകായണെങ്കിലും നിലവില്‍ ഇന്ത്യക്കാരെ ഒഴിപ്പിക്കണ്ടെന്നാണ് കേന്ദ്രത്തിന്റെ തീരുമാനം. അതേസമയം അടിയന്തര സാഹചര്യങ്ങളില്‍ ഇടപെടല്‍ നടത്താന്‍ വ്യോമ, നാവിക സേനകള്‍ക്ക് നിര്‍ദേശം നല്‍കിയിട്ടുണ്ട്. വേണ്ടിവന്നാല്‍ ഇസ്രയേലില്‍ നിന്ന് ഇന്ത്യക്കാരെ ഒഴിപ്പിക്കുന്നത് അടക്കമുള്ള നടപടികളിലേക്ക് കടക്കുമെന്നും സാഹചര്യങ്ങള്‍ പ്രധാനമന്ത്രി നരേന്ദ്രമോദി നേരിട്ട് വിലയിരുത്തുന്നുണ്ടെന്നും കേന്ദ്ര വിദേശകാര്യ മന്ത്രാലയം വ്യക്തമാക്കി.
സംഘര്‍ഷം ആരംഭിച്ച കഴിഞ്ഞ ദിവസം തന്നെ ഇസ്രയേലിലെ ഇന്ത്യക്കാര്‍ക്ക് കേന്ദ്രസര്‍ക്കാരും ഇസ്രയേലിലെ ഇന്ത്യന്‍ എംബസിയും ജാഗ്രതാ നിര്‍ദേശം നല്‍കിയിരുന്നു. അടിയന്തര സാഹചര്യങ്ങളില്‍ ബന്ധപ്പെടാന്‍ ഹെല്‍പ്പെലൈന്‍ നമ്പറും ഇമെയില്‍ വിലാസവും നല്‍കിയിരുന്നു. ഫലസ്തീനിലുള്ള ഇന്ത്യക്കാര്‍ക്കും അടിയന്തര ഘട്ടങ്ങളില്‍ ബന്ധപ്പെടുന്നതിനായി ഹെല്‍പ്പ്‌ലൈന്‍ നമ്പറുകള്‍ ഉള്‍പ്പെടെ പുറത്തിറക്കിയിട്ടുണ്ട്. ആവശ്യങ്ങള്‍ക്ക് ഏത് ഘട്ടത്തിലും ഇന്ത്യന്‍ എംബസിയുമായി ബന്ധപ്പെടാമെന്നും വിദേശകാര്യ മന്ത്രാലയം വ്യക്തമാക്കി.
ന്യൂസ്റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/FSQLmJGMow51SCIIBEEcWV
