March 29, 2021
March 29, 2021
വാഷിംഗ്ടണ്‍: പ്രതിരോധ വാക്സിന് സ്വീകരിച്ച ശേഷവും കോവിഡ് വൈറസ് ബാധയേല്‍ക്കാൻ സാധ്യതയുണ്ടോ?എങ്കിൽ എന്തുകൊണ്ട്?പലരും ഉന്നയിക്കുന്ന സംശയമാണ് ഇത്. വാക്സിന് ഫലപ്രാപ്തി ഇല്ലാത്തതിനാലാണോ ഇങ്ങനെ സംഭവിക്കുന്നതെന്ന് ചിന്തിക്കുന്നവരും കുറവല്ല.ഇതുസംബന്ധിച്ച് നിരവധി പഠനങ്ങള്‍ ലോകത്തിന്റെ വിവിധ ഭാഗങ്ങളിൽ നടക്കുന്നുണ്ട്. അത്തരത്തിലുള്ള ഒരു പഠനത്തിലെ വിവരങ്ങളാണ് ഇപ്പോള്‍ പുറത്തു വരുന്നത്. ന്യൂ ഇംഗ്ലണ്ട് ജേണല്‍ ഓഫ് മെഡിസിനാണ് പഠനം പ്രസിദ്ധീകരിച്ചിരിക്കുന്നത്. വാക്സിന് സ്വീകരിച്ച ശേഷവും രോഗം പിടിപെടാന്‍ സാധ്യതയുണ്ടെന്നാണ് പഠനത്തില്‍ പറയുന്നത്.
മാര്‍ച്ച്‌ 23 നാണ് ന്യൂ ഇംഗ്ലണ്ട് ജേണല്‍ ഓഫ് മെഡിസിന്‍ പഠന റിപ്പോര്‍ട്ട് പ്രസിദ്ധീകരിച്ചത്. ഡിസംബര്‍ 16 നും ഫെബ്രുവരി 9 നും ഇടയില്‍ ഫൈസര്‍ വാക്സിനുകള്‍ സ്വീകരിച്ച ലോസ് ഏഞ്ചലസിലെ ആരോഗ്യ പ്രവര്‍ത്തകര്‍, കാലിഫോര്‍ണിയ സര്‍വ്വകലാശാലയിലെ ജീവനക്കാര്‍, എന്നിവരില്‍ നിന്ന് ശേഖരിച്ച വിവരങ്ങളുടെ അടിസ്ഥാനത്തിലാണ് റിപ്പോര്‍ട്ട് തയ്യാറാക്കിയിരിക്കുന്നത്. കുത്തിവെയ്‌പ്പെടുത്ത ശേഷം കാലിഫോര്‍ണിയ സര്‍വ്വകലാശാലയിലെ നിരവധി പേര്‍ക്ക് രോഗം സ്ഥിരീകരിച്ചിരുന്നു. വാക്സിനേഷന് ശേഷം കോവിഡ് സ്ഥിരീകരിക്കാനുള്ള സാധ്യത 1.19 ആണെന്ന് പഠനം വ്യക്തമാക്കുന്നു.
പഠനത്തിന്റെ ഭാഗമായി 36659 ആദ്യ ഡോസും 28184 രണ്ടാം ഡോസും ഗവേഷകര്‍ സ്വീകരിച്ചു. വാക്സിനേഷന് ശേഷം ഗവേഷക സംഘത്തിന്റെ ഭാഗമായിരുന്ന 379 പേര്‍ക്ക് കോവിഡ് സ്ഥിരീകരിച്ചു. 37 ആരോഗ്യപ്രവര്‍ത്തകര്‍ക്ക് രണ്ടാം ഡോസും സ്വീകരിച്ച ശേഷമാണ് രോഗ ബാധയുണ്ടായത്.
ഇതോടെയാണ് വാക്സിന് കുത്തിവെയ്‌പ്പെടുത്താലും പൂര്‍ണമായും രോഗപ്രതിരോധം നേടാന്‍ സാധിക്കില്ലെന്ന നിഗമനത്തിലേക്ക് ഗവേഷകര്‍ എത്തിയത്. വാക്സിന് ഫലപ്രാപ്തി ഇല്ലാത്തതിനാലല്ല രോഗം സ്ഥിരീകരിക്കുന്നതെന്നും ഗവേഷകര്‍ വ്യക്തമാക്കുന്നു. എല്ലാവരിലും ഒരുപോലെ വാക്സിന് ഗുണം ചെയ്യില്ലെന്നും ചിലര്‍ക്ക് രോഗം പിടിപെടാന്‍ സാധ്യതയുണ്ടെന്നും വിദഗ്ധര്‍ പറയുന്നു. കൊറോണ വൈറസ് ബാധ ഏല്‍ക്കാതിരിക്കാനുള്ള മുന്‍കരുതല്‍ സ്വീകരിക്കുകയാണ് വേണ്ടതെന്നും പഠന റിപ്പോര്‍ട്ടില്‍ വ്യക്തമാക്കുന്നുണ്ട്.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന വാട്സ്ആപ് നമ്പറിൽ സന്ദേശമയക്കുക
