September 05, 2019
September 05, 2019
സംശയം തോന്നിയാൽ പൊലീസ് ഉദ്യോഗസ്ഥരോട് തിരിച്ചറിയല്‍ രേഖകള്‍ ചോദിക്കാന്‍ അനുവാദമുണ്ട്.സിവിലിയന്‍ ഡ്രസിലാണെങ്കില്‍ പ്രത്യേകിച്ച്‌ ഇത് ചോദിച്ചിരിക്കണം. തിരിച്ചറിയല്‍ കാര്‍ഡ് കാണിക്കാത്തപക്ഷം തൊട്ടടുത്ത പൊലീസ് സ്റ്റേഷനില്‍ ബന്ധപ്പെടുകയോ 9999 എന്ന ഹോട്ട്ലൈന്‍ നമ്പറിൽ ബന്ധപ്പെടുകയോ വേണം.
മസ്കത്ത് : മസ്കത്തിലെ വടക്കന്‍ ബാത്തിന ഗവര്‍ണറേറ്റില്‍ പൊലീസ് ചമഞ്ഞ് പിടിച്ചുപറി നടത്തുന്ന ഏഴു പേരെ ഒമാൻ റോയൽ പോലീസ് അറസ്റ്റ് ചെയ്തു. കഴിഞ്ഞ തിങ്കളാഴ്ചയാണ് സംഭവം.പ്രതികള്‍ ഏതു രാജ്യക്കാര്‍ ആണെന്നതടക്കമുള്ള വിവരങ്ങള്‍ ലഭ്യമല്ല. ഒറ്റക്ക് സഞ്ചരിക്കുന്ന വിദേശ തൊഴിലാളികളാണ് പലപ്പോഴും ഇത്തരം വ്യാജ പൊലീസുകാരുടെ തട്ടിപ്പുകൾക്ക് ഇരയാകുന്നത്. ദൃക്സാക്ഷികളില്ലെന്ന് ഉറപ്പുള്ള മേഖലകളില്‍ ഇരകളെ തടഞ്ഞ് ബലം പ്രയോഗിച്ച്‌ പണം കൈവശപ്പെടുത്തുകയാണ് ഇവര്‍ ചെയ്യുക. വിദേശികളുടെ താമസ സ്ഥലങ്ങളില്‍ അതിക്രമിച്ച്‌ കയറി പിടിച്ചുപറി നടത്തിയ സംഭവങ്ങളും ഉണ്ടായിട്ടുണ്ട്. റിപ്പോര്‍ട്ട് ചെയ്യപ്പെട്ട സംഭവങ്ങളിലെല്ലാം പൊലീസ് പ്രതികളെ പിടികൂടിയതായാണ് വിവരം.
സര്‍ക്കാര്‍ ഉദ്യോഗസ്ഥര്‍ ചമഞ്ഞ് കവര്‍ച്ച നടത്തുന്ന കേസുകളില്‍ കര്‍ശന ശിക്ഷ വ്യവസ്ഥകളാണ് ഒമാന്‍ ശിക്ഷാ നിയമം വ്യവസ്ഥ ചെയ്യുന്നത്. വിവിധ വകുപ്പുകളിലായി ഒരു മാസം മുതല്‍ മൂന്നുവര്‍ഷംവരെ തടവും 100 റിയാല്‍ മുതല്‍ 1000 റിയാല്‍ വരെ പിഴയുമാണ് ഇത്തരം കേസുകളില്‍ പിടിയിലാകുന്നവര്‍ക്ക് ശിക്ഷ ലഭിക്കുക.
