November 30, 2022
November 30, 2022
അൻവർ പാലേരി
ദോഹ : മുൻ ഇന്ത്യൻ ഫുട്‍ബോൾ ക്യാപ്റ്റനും മലയാളി താരവുമായ വി.പി സത്യന്റെ ജീവിതം ആധാരമാക്കി പ്രജേഷ് സെൻ രചനയും സംവിധാനവും നിർവഹിച്ച ക്യാപ്റ്റൻ സിനിമയുടെ തിരക്കഥ രണ്ടാം പതിപ്പ് ദോഹയിൽ പ്രകാശനം ചെയ്തു.ഖത്തർ ഇന്ത്യൻ കൾച്ചറൽ സെന്റർ(ഐസിസി)പ്രസിഡന്റ് പി.എൻ ബാബുരാജനിൽ നിന്ന് സിനിമാ, സീരിയൽ താരം പ്രദീപ് പ്രഭാകർ പുസ്തകം ഏറ്റുവാങ്ങി.കോഴിക്കോട്ടെ ലിപി പബ്ലിഷേഴ്‌സാണ് പുസ്തകത്തിന്റെ പ്രസാധകർ.
നാൽപത്തിയൊന്നാം വയസ്സിൽ അകാലത്തിൽ അന്തരിച്ച വി.പി സത്യന്റെ ജീവിതം ആധാരമാക്കി നിർമിച്ച ക്യാപ്റ്റൻ സിനിമയിൽ ജയസൂര്യയാണ് നായകവേഷത്തിൽ അഭിനയിച്ചത്.കണിശമായ അച്ചടക്കത്തില്‍ കളിക്കളങ്ങളെ കയ്യടക്കിയ സത്യന്‍ പിന്നീട് കളിക്കളത്തിൽ നിന്ന് വിട്ടുനിൽക്കേണ്ടിവന്നതോടെ നേരിട്ട മാനസിക സംഘർഷങ്ങളും ജീവിത പ്രാരാബ്ധങ്ങളുമാണ് സിനിമയുടെ പ്രമേയം. കായികരംഗം നല്‍കിയ അവഗണനയില്‍ മനം നൊന്ത് വിഷാദരോഗത്തിലൂടെ മരണത്തിലേക്കു നടന്നടുത്ത വി.പി.സത്യന്റെ അന്ത്യം ഒരുതരത്തിലുള്ള 'സെൽഫ് ഗോളാ'യിരുന്നുവെന്ന് സിനിമ വ്യംഗമായി സൂചിപ്പിക്കുന്നുണ്ട്.
പ്രൊഫഷണൽ ബിസിനസ് ഗ്രൂപ് ഓഫീസിൽ നടന്ന ചടങ്ങിൽ സംവിധായകനും മാധ്യമപ്രവർത്തകനുമായ ജി.പ്രജേഷ് സെൻ, കേരളാ ബിസിനസ് ഫോറം അഡ്വൈസറി ചെയർമാൻ കെ.ആർ ജയരാജ്,പ്രൊഫഷണൽ ബിസിനസ് ഗ്രൂപ് മാനേജിങ് ഡയറക്റ്റർ അലി ഹസ്സൻ,ആർ.ജെ പാർവതി,ലോകകപ്പ് ഫുട്‍ബോൾ കാണാൻ ഖത്തറിൽ എത്തിയ ആസിം വെളിമണ്ണ തുടങ്ങിയവർ പങ്കെടുത്തു.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/C2rupFykVgXBqmlpJc6amX എന്ന ലിങ്കിൽ ജോയിൻ ചെയ്യുക
