May 02, 2024
May 02, 2024
ദോഹ: ഖത്തറിൽ നാഷണൽ പ്ലാനിംഗ് കൗൺസിൽ സ്ഥാപിക്കുന്നതിനുള്ള തീരുമാനം ഖത്തർ അമീർ ഷെയ്ഖ് തമീം ബിൻ ഹമദ് അൽ താനി പ്രഖ്യാപിച്ചു. അമീരി ദിവാന്റെ ഔദ്യോഗിക സോഷ്യൽ മീഡിയ അക്കൗണ്ടിലൂടെയാണ് ഇക്കാര്യം അറിയിച്ചത്. 2024-ലെ 13-ാം നമ്പർ നിയമപ്രാകാരമാണ് തീരുമാനം.
നാഷണൽ പ്ലാനിംഗ് കൗൺസിലിൻ്റെ പ്രസിഡന്റായി ഖത്തർ പ്രധാനമന്ത്രി മുഹമ്മദ് ബിൻ അബ്ദുൽറഹ്മാൻ ബിൻ ജാസിം അൽതാനിയും, വൈസ് പ്രസിഡന്റായി ഖത്തർ ധനമന്ത്രി അലി അഹമ്മദ് അൽ കുവാരിയും, സെക്രട്ടറി ജനറലായി അബ്ദുൽ അസീസ് ബിൻ നാസർ ബിൻ മുബാറക് അൽ ഖലീഫയും ചുമതലയേൽക്കും.
പരിസ്ഥിതി കാലാവസ്ഥാ വ്യതിയാന മന്ത്രി, വിദ്യാഭ്യാസ ഉന്നത വിദ്യാഭ്യാസ മന്ത്രി, വാണിജ്യ വ്യവസായ മന്ത്രി, തൊഴിൽ മന്ത്രി, കമ്മ്യൂണിക്കേഷൻസ് ആൻഡ് ഇൻഫർമേഷൻ ടെക്നോളജി മന്ത്രി, മുനിസിപ്പാലിറ്റി മന്ത്രി, ഊർജകാര്യ സഹമന്ത്രി, കാബിനറ്റ് കാര്യ സഹമന്ത്രി എന്നിവർക്കും കൗൺസിലിൽ അംഗത്വം ഉണ്ടായിരിക്കും.
പ്രസിഡൻ്റിന് മറ്റ് ബന്ധപ്പെട്ട പാർട്ടികളുടെ പ്രതിനിധികളെ കൗൺസിലിൻ്റെ അംഗത്വത്തിലേക്ക് ചേർക്കാം. നിയമം പ്രഖ്യാപിച്ച തീയതി മുതൽ പ്രാബല്യത്തിൽ വരുമെന്നും, ഔദ്യോഗിക ഗസറ്റിൽ പ്രസിദ്ധീകരിക്കുമെന്നും അമീരി ദിവാൻ അറിയിച്ചു.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/Iq3CVicSDrS1LvIBvvkToc
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
