April 12, 2023
April 12, 2023
ന്യൂസ്‌റൂം ബ്യൂറോ
ദോഹ: ഷീഷ(ഹുക്ക) വലിക്കുന്നത് ഹൃദ്രോഗങ്ങള്‍ക്ക് കാരണമാകുന്നുവെന്ന് ഖത്തര്‍ സര്‍വകലാശാലയിലെ ഗവേഷണ സംഘത്തിന്റെ പഠനം. ഷീഷയുടെ അപകടസാധ്യതയെക്കുറിച്ച് സമഗ്ര ബോധവല്‍ക്കരണം അനിവാര്യമാണെന്ന് ഗവേഷകര്‍ പറയുന്നു. ഷീഷ വലിയും മുതിര്‍ന്നവര്‍ക്കിടയില്‍ വര്‍ധിച്ചു വരുന്ന ഹൃദ്രോഗ സാധ്യതയും തമ്മിലുള്ള ബന്ധത്തെക്കുറിച്ചുള്ള പഠനത്തിലാണ് ഗവേഷകരുടെ ഈ കണ്ടെത്തല്‍.
ഷീഷ വലിക്കുന്നവരില്‍ നിന്നും ശേഖരിച്ച ഡാറ്റയുടെ അടിസ്ഥാനത്തിലായിരുന്നു പഠനം. ദേശീയ ഗവേഷണ സ്ഥാപനമായ ഖത്തര്‍ ബയോബാങ്കില്‍ നിന്ന് ശേഖരിച്ച വിവരങ്ങളാണ് പഠനത്തിന് ഉപയോഗിച്ചത്. ഷീഷ മാത്രം വലിക്കുന്നവരിലെ ഹൃദ്രോഗ സാധ്യത 1.65 മടങ്ങ് കൂടുതലാണെന്ന് കണ്ടെത്തി. ചെറുപ്പത്തില്‍ ഷീഷ വലിച്ചു തുടങ്ങുന്നവരില്‍ ഹൃദയ സംബന്ധമായ രോഗങ്ങള്‍ക്കുള്ള അപകടസാധ്യതയും വളരെ വലുതാണ്.
പുകയില ഉല്‍പന്നങ്ങളുടെ നികുതി വര്‍ധിപ്പിക്കല്‍, പൊതുഇടങ്ങളില്‍ പുകവലി നിരോധിക്കല്‍ തുടങ്ങി ദേശീയ നയങ്ങളിലൂടെയും ഷീഷ വലിയുടെ അപകടസാധ്യതയെക്കുറിച്ചുള്ള സമഗ്ര ബോധവല്‍ക്കരണ ശ്രമങ്ങളിലൂടെയും ഷീഷ ഉപയോഗം കുറയ്ക്കണമെന്ന് വിദഗ്ധര്‍ അഭിപ്രായപ്പെട്ടു.
ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/KIGk615xlF1ILlMGxpUXqI
