February 11, 2023
February 11, 2023
ന്യൂസ്‌റൂം ബ്യുറോ
ദോഹ : തുർക്കിയിലെയും സിറിയയിലെയും ഭൂകമ്പ ദുരിതബാധിതർക്കായി ഖത്തർ ടെലിവിഷൻ സംഘടിപ്പിച്ച തത്സമയ സംപ്രേഷണത്തിലൂടെ മണിക്കൂറുകൾക്കകം സമാഹരിച്ചത് 168 മില്യൺ റിയാൽ.വെള്ളിയാഴ്ച വൈകുന്നേരം 5.30-ന് ആരംഭിച്ച ഖത്തർ ടിവി ലൈവ് ടെലിതോണിൽ അർദ്ധരാത്രിയായതോടെ സുമനസ്സുകളിൽ നിന്നും 168,015,836 റിയാലിന്റെ സഹായ വാഗ്ദാനങ്ങളാണ് ലഭിച്ചത്.
പണവും സാധനങ്ങളും സമാഹരിക്കാൻ നിരവധി സ്ഥലങ്ങളിൽ സൗകര്യമൊരുക്കിയതായും അധികൃതർ പറഞ്ഞു. കത്താറ, സൂഖ് വാഖിഫ്, ആസ്പൈർ പാർക്ക് എന്നീ സ്ഥലങ്ങളിലാണ് സൗകര്യമൊരുക്കിയത്.
റൗദ ബിൻത് ഫഹദ് എന്ന കുട്ടി രണ്ട് മില്യൺ റിയാൽ നൽകി.
സ്വദേശികളും പ്രവാസികളുമായ വ്യവസായികളും വിവിധ കമ്പനികളും രാജ്യത്തുടനീളമുള്ള വിവിധ സ്ഥാപനങ്ങളും നിരവധി ഖത്തരി കുട്ടികളും ഉൾപ്പെടെ സമൂഹത്തിന്റെ എല്ലാ വിഭാഗങ്ങളിൽ നിന്നും സംഭാവനകൾ ഒഴുകിയെത്തി.ഔഖാഫിൽ നിന്ന് 10 മില്യൺ റിയാൽ, ഊരീദു ഖത്തർ, ദോഹ ബാങ്ക്, ഖത്തറിലെ പ്രമുഖ വ്യവസായി ഹുസൈൻ അൽഫർദാൻ എന്നിവരിൽ നിന്നും 1 മില്യൺ റിയാൽ വീതം എന്നിവ സംഭാവനകളിൽ ഉൾപ്പെടുന്നു.പേര് വെളിപ്പെടുത്തരുതെന്ന നിബന്ധനയോടെ നിരവധി പേർ ഭീമമായ തുക സംഭാവനയായി നൽകിയതായും റിപ്പോർട്ടിൽ പറയുന്നു.
നിരവധി ചാരിറ്റി ഓർഗനൈസേഷനുകളിൽ നിന്നുള്ള പ്രതിനിധികൾ തത്സമയ സംപ്രേഷണത്തിൽ പങ്കെടുത്തിരുന്നു.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/CZ8evyItpDFGmuyTIzjnaL എന്ന ലിങ്കിൽ ജോയിൻ ചെയ്യുക
