June 08, 2023
June 08, 2023
ന്യൂസ്‌റൂം ബ്യുറോ
ദോഹ : തായ്‌ലൻഡിൽ നിന്നുള്ള പുതിയ ഇനോകി കൂൺ കഴിക്കുന്നതിനെതിരെ പൊതുജനാരോഗ്യ മന്ത്രാലയം (MoPH) മുന്നറിയിപ്പ് നൽകി.മന്ത്രാലയത്തിന്റെ സെൻട്രൽ ഫുഡ് ലബോറട്ടറികളിലെ വിശകലനത്തിന്റെ അടിസ്ഥാനത്തിൽ ഈ ഉൽപന്നത്തിന്റെ ഇറക്കുമതി ചെയ്ത പായ്ക്കുകളിൽ രോഗകാരിയായ ലിസ്റ്റീരിയ മോണോസൈറ്റോജെൻസ് എന്ന ബാക്ടീരിയ അടങ്ങിയതായി കണ്ടെത്തിയിട്ടുണ്ടെന്ന് മന്ത്രാലയം പ്രസ്താവനയിൽ അറിയിച്ചു.
“ചില രാജ്യങ്ങളിൽ നിന്നുള്ള റിപ്പോർട്ടുകൾ പ്രകാരം, ഈ ഉൽപ്പന്നത്തിൽ ബാക്ടീരിയകളുടെ സാന്നിധ്യം സ്ഥിരീകരിച്ചതിനാൽ പൊതുജനാരോഗ്യ മന്ത്രാലയം, മുനിസിപ്പാലിറ്റി മന്ത്രാലയവുമായി ചേർന്ന് ഇവ വിപണിയിൽ നിന്ന് പിൻവലിച്ചിട്ടുണ്ട്.പുറത്തുനിന്നെത്തിയ മുഴുവൻ ഉൽപന്നവും ലബോറട്ടറി പരിശോധനയ്ക്ക് വിധേയമാക്കുകയും ചെയ്തിട്ടുണ്ട്. തുടർപരിശോധനകൾക്കും നടപടികൾക്കുമായി മന്ത്രാലയത്തിന്റെ ഭക്ഷ്യ പരിശോധനാ സംഘത്തെയും നിയോഗിച്ചിട്ടുണ്ട്..നേരത്തെ വാങ്ങിയ ഉൽപന്നങ്ങൾ സൂക്ഷിക്കുന്നുണ്ടെങ്കിൽ അവ ഉപയോഗിക്കാതെ ഉപേക്ഷിക്കാൻ അഭ്യർത്ഥിക്കുന്നു..ഉൽപ്പന്നം വാങ്ങിയ ഔട്ട്‌ലെറ്റുകളിൽ തന്നെ അവ തിരികെ നൽകാനും ഉപഭോക്താക്കൾക്ക് അവസരമുണ്ട്.നിലവിൽ ഈ ഉൽപന്നം കഴിച്ചവരുണ്ടെങ്കിൽ ഛർദ്ദി, ഓക്കാനം അല്ലെങ്കിൽ നിരന്തരമായ പനി, പേശി വേദന ,കടുത്ത തലവേദന തുടങ്ങിയ ലക്ഷണങ്ങൾ അനുഭവപ്പെടുന്നുണ്ടെങ്കിൽ എത്രയും വേഗം ഏറ്റവും അടുത്തുള്ള ആരോഗ്യ കേന്ദ്രം സന്ദർശിക്കണം"-ആരോഗ്യമന്ത്രാലയം പ്രസ്താവനയിൽ ആവശ്യപ്പെട്ടു.
ഇതുവരെ ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/EbsrZk47eaBENKOhwtWeGf
