December 04, 2022
December 04, 2022
ന്യൂസ്‌റൂം ബ്യുറോ
ദോഹ: വെല്ലുവിളികളെ മുഴുവൻ അതിജീവിച്ച് 2022ലെ ഫിഫ ലോകകപ്പ് വിജയകരമായി നടത്തിവരുന്ന ഖത്തർ,ആഗോള കായികമേളയായ ഒളിമ്പിക്‌സിനും തയാറെടുക്കുന്നതായി റിപ്പോർട്ട്.ലോകകപ്പിന്റെ വിജയകരമായ സംഘാടനം നൽകിയ ധൈര്യം ഭാവിയിലേക്കുള്ള ഊർജ്ജമായാണ് ഈ കൊച്ചു അറബ് രാജ്യം കരുതുന്നത്. 2036 സമ്മർ ഒളിമ്പിക്സ് ആണ് അടുത്ത ലക്ഷ്യം. വിശ്വ കായികമാമാങ്കമായ ഒളിമ്പിക്സിന് ആതിഥേയത്വം വഹിക്കുക എന്ന സ്വപ്നത്തിനായുള്ള പരിശ്രമം ഖത്തർ തുടങ്ങിക്കഴിഞ്ഞതായി ഒളിമ്പിക് ബിഡ്ഡിംഗ് നടപടികളുമായി ബന്ധമുള്ള ഒരു ഉറവിടത്തെ ഉദ്ധരിച്ച് വാർത്താ ഏജൻസിയായ റോയിട്ടേഴ്‌സ് റിപ്പോർട്ട് ചെയ്തു.
അതേസമയം, 2036ലെ ഒളിമ്പിക്സിനെ കുറിച്ചുള്ള ചർച്ചകൾ അന്താരാഷ്ട്ര ഒളിമ്പിക് കമ്മിറ്റി ഇതുവരെ തുടങ്ങിയിട്ടില്ല. 2016 ലും 2020 ലും ഖത്തർ വേദിക്കായി ശ്രമം നടത്തിയിരുന്നു. മരുഭൂമിയിലെ വേനൽക്കാല താപനിലയെക്കുറിച്ചുള്ള ആശങ്കകൾ കാരണം അവ പരാജയപ്പെട്ടു. ഫിഫ ലോകകപ്പിൽ ചൂട് ലഘൂകരിക്കാൻ രാജ്യത്തെ സ്റ്റേഡിയങ്ങളിൽ ഉപയോഗിക്കുന്ന നൂതന എയർ കണ്ടീഷനിംഗ് സംവിധാനങ്ങൾ ലോകശ്രദ്ധ പിടിച്ചുപറ്റിയത് മുതലാണ് ഒളിമ്പിക്സ് സംഘടനം എന്ന സ്വപ്നം ഖത്തർ പൊടിതട്ടിയെടുക്കുന്നത്. 2019-ൽ ലോക അത്‌ലറ്റിക് ചാമ്പ്യൻഷിപ്പ് ദോഹയിൽ അരങ്ങേറിയിരുന്നു.
ഒളിമ്പിക്സ് വേദി തെരഞ്ഞെടുപ്പിനുള്ള പരമ്പരാഗത ബിഡ്ഡിംഗ് പ്രക്രിയയിൽ മാറ്റം വന്നിട്ടുണ്ട്. താൽപ്പര്യമുള്ള നഗരങ്ങളിൽ നിന്ന് ഒരു വേദി തിരഞ്ഞെടുക്കുന്നതാണ് പുതിയ രീതി. ഈ രീതി ഉപയോഗിച്ചുള്ള ആദ്യഭാഗ്യം നേടിയത് ബ്രിസ്ബേൻ ആണ്. 2032 ഒളിമ്പിക്സിന് ഓസ്ട്രേലിയൻ നഗരമാണ് ആതിഥേയത്വം വഹിക്കുന്നത്.
ഇന്ത്യ, ഇന്തോനേഷ്യ, ദക്ഷിണ കൊറിയ, ജർമനി തുടങ്ങിയ പത്തോളം രാജ്യങ്ങൾ 2036 ഗെയിംസ് നടത്തുന്നതിന് താൽപ്പര്യം പ്രകടിപ്പിച്ചു കഴിഞ്ഞിട്ടുണ്ട്. ഈ ലോകകപ്പിന്റെ ഇതുവരെയുള്ള വിജയമാണ് ഖത്തറിന്റെ തുറുപ്പ്ചീട്ട്. തങ്ങൾക്ക് എന്തും സാധിക്കുമെന്ന് അവർ ഇതിനകം തെളിയിച്ചു കഴിഞ്ഞു. 2006 ഏഷ്യൻ ഗെയിംസിന്റെ ആതിഥേയത്വമാണ് 2022 ലോകകപ്പിലേക്ക് നയിച്ചതെങ്കിൽ, ഇത് തീർച്ചയായും ഒളിമ്പിക്സിലേക്ക് എത്തുമെന്നാണ് വിശ്വസനീയമായ ഉറവിടങ്ങളിൽ നിന്ന് ലഭിക്കുന്ന വിവരം. ഉന്നത നിലവാരത്തിലുള്ള സ്റ്റേഡിയങ്ങൾ, മെട്രോ, വിമാനത്താവളങ്ങൾ എന്നിവ ഈ ശ്രമത്തിന് മുതൽകൂട്ടാകുമെന്നാണ് പ്രതീക്ഷിക്കുന്നത്.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/C2rupFykVgXBqmlpJc6amX എന്ന ലിങ്കിൽ ജോയിൻ ചെയ്യുക
