April 13, 2023
April 13, 2023
ന്യൂസ്‌റൂം ബ്യുറോ
ദോഹ :വർഷങ്ങളുടെ ഇടവേളക്കും അഭിപ്രായ ഭിന്നതകൾക്കും ശേഷം ഖത്തറിനും ബഹ്റൈനുമിടയിൽ നയതന്ത്ര ബന്ധം പുനഃസ്ഥാപിക്കുന്നതിനുള്ള കൂടിയാലോചനകൾ പുരോഗമിക്കുന്നു.ഇതിന്റെ ഭാഗമായി ഇരു രാജ്യങ്ങളിലെയും ഫോളോ-അപ്പ് കമ്മിറ്റിയുടെ രണ്ടാമത്തെ യോഗം ബുധനാഴ്ച സൗദി അറേബ്യയിലെ റിയാദിലുള്ള ജിസിസി ആസ്ഥാനത്ത് ചേർന്നു.
ഖത്തർ പ്രതിനിധി സംഘത്തെ വിദേശകാര്യ മന്ത്രാലയം സെക്രട്ടറി ജനറൽ ഡോ. അഹമ്മദ് ബിൻ ഹസൻ അൽ ഹമ്മാദിയുടെ നേതൃത്വത്തിലുള്ള പ്രതിനിധി സംഘമാണ് ചർച്ചയിൽ പങ്കെടുത്തത്. ബഹ്‌റൈൻ വിദേശകാര്യ മന്ത്രാലയത്തിലെ പൊളിറ്റിക്കൽ അഫയേഴ്‌സ് അണ്ടർസെക്രട്ടറി ഷെയ്ഖ് ഡോ. അബ്ദുല്ല ബിൻ അഹമ്മദ് അൽ ഖലീഫ ബഹ്‌റൈൻ പ്രതിനിധി സംഘത്തിന് നേതൃത്വം നൽകി.ഐക്യരാഷ്ട്രസഭാ ചാർട്ടറിന്റെ തത്വങ്ങളും 1961ലെ നയതന്ത്രബന്ധത്തെക്കുറിച്ചുള്ള വിയന്ന ഉടമ്പടിയുടെ വ്യവസ്ഥകളും അനുസരിച്ച് ഇരുരാജ്യങ്ങളും തമ്മിലുള്ള നയതന്ത്രബന്ധം പുനഃസ്ഥാപിക്കാൻ യോഗത്തിൽ തീരുമാനമായി.
2021 ജനുവരി 5ന് സൗദിയിൽ ചേർന്ന ജിസിസി ഉച്ചകോടിയിലെ അൽ ഉല കരാറിൽ ഖത്തറിനെതിരായ ഉപരോധവും തുടർന്നുണ്ടായ ഗൾഫ് പ്രതിസന്ധിയും പരിഹരിക്കുന്നതിനുള്ള പ്രഖ്യാപനമുണ്ടായെങ്കിലും വ്യവസ്ഥകൾ നടപ്പാക്കുന്നുണ്ടെന്ന് ഉറപ്പുവരുത്താനായി ഫോളോഅപ്പ് കമ്മറ്റികൾ ചേർന്ന് കാര്യങ്ങൾ വിലയിരുത്തി വരികയാണ്.അതേസമയം,അൽ ഉല കരാറോടെ ഖത്തറിനും മറ്റു ഗൾഫ് രാജ്യങ്ങൾക്കുമിടയിലെ ഭിന്നതകൾ ഏറെക്കുറെ പരിഹരിക്കപ്പെട്ടെങ്കിലും ബഹ്‌റൈനും ഖത്തറിനുമിടയിൽ പഴയ സൗഹൃദം ഇനിയും രൂപപ്പെട്ടിട്ടില്ല.
ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/KIGk615xlF1ILlMGxpUXqI
