November 28, 2021
November 28, 2021
ഒമിക്രോൺ ഭീഷണി : ആഫ്രിക്കൻ രാജ്യങ്ങളിൽ നിന്നുള്ള വിമാനങ്ങൾക്ക് കൂടുതൽ ഗൾഫ് രാജ്യങ്ങളിൽ വിലക്ക്
ദോഹ :പുതിയ കൊവിഡ് വകഭേദത്തിന്റെ പശ്ചാത്തലത്തില് ഒമ്പത് ആഫ്രിക്കന് രാജ്യങ്ങളില് നിന്നുള്ള വിമാനങ്ങള്ക്ക് ഗൾഫ് രാജ്യങ്ങളിൽ വിലക്ക് ഏര്പ്പെടുത്തി. ദക്ഷിണാഫ്രിക്കയുള്പ്പെടെ മൂന്ന് രാജ്യങ്ങളില് നിന്നുള്ളവര്ക്ക് ഖത്തര് എയര്വേയ്സ് യാത്രാ വിലക്ക് ഏര്പ്പെടുത്തിയപ്പോൾ. എട്ട് ആഫ്രിക്കന് രാജ്യങ്ങളെ കൂടി എക്സപ്ഷണല് റെഡ് ലിസ്റ്റില് ഉള്പ്പെടുത്തി. ദക്ഷിണാഫ്രിക്ക, സിംബാബ്വെ, മൊസാംബിക് എന്നീ രാജ്യങ്ങളില് നിന്നുള്ള യാത്രക്കാര്ക്കാണ് ഖത്തര് എയര്വേയ്സ് യാത്രാവിലക്കേര്പ്പെടുത്തിയത്. ഖത്തര് എയര്വേയ്സിന്റെ ഒരു വിമാനങ്ങളിലും ഈ രാജ്യങ്ങളില് നിന്നുള്ളവരെ പ്രവേശിപ്പിക്കില്ലെന്നാണ് അറിയിപ്പ്. പുതിയ നിയന്ത്രണങ്ങള് സംബന്ധിച്ച കൂടുതല് വിവരങ്ങള്ക്കായി ഖത്തര് എയര്വേയ്സ് ഹോട്ട്ലൈന് നമ്പറില് വിളിക്കാവുന്നതാണ്. അതിനിടെ എട്ട് ആഫ്രിക്കന് രാജ്യങ്ങളെ കൂടി ഉള്പ്പെടുത്തി ഖത്തറിന്റെ കോവിഡ് അതിതീവ്രബാധിത രാജ്യങ്ങളുടെ പട്ടിക വികസിപ്പിച്ചു. ദക്ഷിണാഫ്രിക്ക, തെക്കന് സുഡാന്, സുഡാന്, സിംബാബ്വെ, നമീബിയ, ലെസോത്തോ, ഐശ്വതിനി, ബോട്സ്വാന, തുടങ്ങി രാജ്യങ്ങളെയാണ് എക്സപ്ഷണല് റെഡ് ലിസ്റ്റില് ഉള്പ്പെടുത്തിയത്. ഇന്ത്യയുള്പ്പെടെ ആറ് ഏഷ്യന് രാജ്യങ്ങളും ഈ ലിസ്റ്റില് തന്നെയാണുള്ളത്. ഈ ലിസ്റ്റിലുള്ള രാജ്യങ്ങളില് നിന്ന് വരുന്നവര്ക്ക് 72 മണിക്കൂറിനുള്ളില് എടുത്ത ആര്ടിപിസിആര് നെഗറ്റീവ് സര്ട്ടിഫിക്കറ്റ് നിര്ബന്ധമാണ്. വാക്സിനെടുത്തവരാണെങ്കില് രണ്ട് ദിവസത്തെ ഹോട്ടല് ക്വാറന്റൈനും അല്ലെങ്കില് ഏഴ് ദിവസത്തെ ക്വാറന്റൈനും നിര്ബന്ധമാണ്.
ദക്ഷിണാഫ്രിക്ക( South Africa), നമീബിയ(Namibia), ബോട്സ്വാന(Botswana), സിംബാവെ(Zimbabwe), മൊസാംബിക്(Mozambique), ലിസോത്തോ (Lesotho), ഈസ്വാതിനി(Eswatini), സാംബിയ (Zambia), മാലാവി(Malawi) എന്നീ രാജ്യങ്ങളില് നിന്നുള്ള വാണിജ്യ വിമാനങ്ങള്ക്ക് വിലക്ക് ഏർപ്പെടുത്തിയതായി കുവൈത്ത് സിവിൽ ഏവിയേഷൻ അറിയിച്ചു.കാര്ഗോ വിമാനങ്ങളെ വിലക്കില് നിന്ന് ഒഴിവാക്കിയിട്ടുണ്ട്. ഈ രാജ്യങ്ങളില് നിന്ന് കുവൈത്തിലേക്ക് എത്തുന്ന സ്വദേശികള് ഏഴ് ദിവസം ഇന്സ്റ്റിറ്റ്യൂഷണല് ക്വാറന്റീനില് കഴിയണം. വിമാനത്താവളത്തിലും രാജ്യത്തെത്തി ആറാം ദിവസവും പിസിആര് പരിശോധനയ്ക്ക് വിധേയരാകുകയും വേണം. വിലക്ക് ഏര്പ്പെടുത്തിയിട്ടുള്ള രാജ്യങ്ങളില് നിന്ന് വരുന്ന പ്രവാസികള്ക്കും കുവൈത്തിലേക്ക് പ്രവേശനം അനുവദിക്കില്ല. ഇവര്ക്ക് മറ്റ് രാജ്യങ്ങളില് 14 ദിവസം താമസിച്ച ശേഷം കുവൈത്തിലേക്ക് മടങ്ങിയെത്താം.
പുതിയ കൊവിഡ് വകഭേദം കണ്ടെത്തിയ സാഹചര്യത്തില് സൗദി അറേബ്യ, യുഎഇ, ബഹ്റൈന്, ഒമാന് എന്നീ രാജ്യങ്ങളും ദക്ഷിണാഫ്രിക്കന് രാജ്യങ്ങളില് നിന്നുള്ള യാത്രക്കാര്ക്ക് പ്രവേശന വിലക്ക് ഏര്പ്പെടുത്തിയിരുന്നു.
കൊവിഡ് വകഭേദം; ഏഴ് രാജ്യങ്ങളില് നിന്നുള്ള യാത്രക്കാര്ക്ക് യുഎഇയില് പ്രവേശന വിലക്ക്
പുതിയ കൊവിഡ് വകഭേദത്തിന്റെ(Covid 19 variant) പശ്ചാത്തലത്തില് ഏഴ് ആഫ്രിക്കന് രാജ്യങ്ങളില് നിന്നുള്ള യാത്രക്കാര്ക്ക് യുഎഇ(UAE) വിലക്ക് ഏര്പ്പെടുത്തി. ദക്ഷിണാഫ്രിക്ക(South Africa), നമീബിയ(Namibia), ബോട്സ്വാന(Botswana ), ലിസോത്തോ(Lesotho), ഇസ്വാതിനി(Eswatini), സിംബാവെ(Zimbabwe), മൊസംബിക്(Mozambique ) എന്നീ രിജ്യങ്ങളില് നിന്നുള്ള യാത്രക്കാര്ക്കാണ് യുഎഇയില് താല്ക്കാലിക പ്രവേശന വിലക്ക് ഏര്പ്പെടുത്തിയതെന്ന് ജനറല് സിവില് ഏവിയേഷന് അതോറിറ്റിയും നാഷണല് അതോറിറ്റി ഫോര് എമര്ജന്സി, ക്രൈസിസ് ആന്ഡ് ഡിസാസ്റ്റേഴ്സ് മാനേജ്മെന്റും അറിയിച്ചു.
നവംബര് 29 മുതല് തീരുമാനം പ്രാബല്യത്തില് വരും. 14 ദിവസത്തിനിടെ ഈ ഏഴ് രാജ്യങ്ങള് സന്ദര്ശിച്ചവര്ക്കും യുഎഇയിലേക്ക് പ്രവേശനമുണ്ടാകില്ല. ഇവര്ക്ക് മറ്റ് രാജ്യങ്ങളില് 14 ദിവസം താമസിച്ച ശേഷം യുഎഇയിലേക്ക് വരാം. എന്നാല് യുഎഇ പൗരന്മാര്, നയതന്ത്ര പ്രതിനിധികള്, ഗോള്ഡന് വിസയുള്ളവര് എന്നിവര്ക്ക് ഇളവുകളുണ്ട്. ഇവര് യാത്രക്ക് 48 മണിക്കൂര് മുമ്പെടുത്ത കൊവിഡ് നെഗറ്റീവ് ഫലം കരുതണം. വിമാനത്താവളത്തില് റാപിഡ് പരിശോധനയ്ക്ക് വിധേയരാകണം. 10 ദിവസം ക്വാറന്റീനില് കഴിയുകയും രാജ്യത്ത് പ്രവേശിച്ച ശേഷം ഒമ്പതാം ദിവസം പിസിആര് പരിശോധന നടത്തുകയും വേണമെന്ന് അധികൃതര് വ്യക്തമാക്കി.
എന്നാല് ഈ ആഫ്രിക്കന് രാജ്യങ്ങളിലേക്കുള്ള വിമാനങ്ങള്ക്ക് യുഎഇ നിലവില് വിലക്ക് ഏര്പ്പെടുത്തിയിട്ടില്ല. യുഎഇ പൗരന്മാര് ഈ ഏഴ് രാജ്യങ്ങളിലേക്ക് യാത്ര ചെയ്യുന്നത് വിലക്കിയിട്ടുണ്ട്. ഔദ്യോഗിക പ്രതിനിധികള്, അടിയന്തര മെഡിക്കല്, വിദ്യാഭ്യാസ ആവശ്യങ്ങള് എന്നിവയ്ക്ക് ഇളവുകളുണ്ട്.
ന്യൂസ്റൂം വാർത്തകൾ ലഭിക്കാൻ +974 33450 593 വാട്സ്ആപ് നമ്പറിൽ സന്ദേശമയക്കുക