June 15, 2023
June 15, 2023
ന്യൂസ്‌റൂം ബ്യുറോ
ദോഹ :ഖത്തറിൽ നാളെയും മറ്റന്നാളുമായി നടത്താൻ നിശ്ചയിച്ചിരുന്ന പ്രഥമ കയാക് ഫിഷിങ് മത്സരം മാറ്റിവെച്ചു.മോശം കാലാവസ്ഥയെ തുടർന്ന് മത്സരം ജൂൺ 23, 24 തിയ്യതികളിലേക്ക് മാറ്റിവെച്ചതായി സംഘാടകർ അറിയിച്ചു.
കഴിഞ്ഞ ദിവസം മുതൽ അനുഭവപ്പെടുന്ന ശക്തമായ കാറ്റ് അടുത്ത വാരാന്ത്യം വരെ തുടരുമെന്ന് കാലാവസ്ഥാ വിഭാഗം മുന്നറിയിപ്പ് നൽകിയിരുന്നു.ഈ സാഹചര്യത്തിലാണ് മത്സരത്തിൽ പങ്കെടുക്കുന്നവരുടെ സുരക്ഷ കണക്കിലെടുത്ത് തിയ്യതിയിൽ മാറ്റം വരുത്തുന്നതെന്നും രജിസ്ട്രേഷൻ കാലാവധി ജൂൺ 22 വരെ നീട്ടിയതായും ദോഹ പോർട്ട് സമൂഹ മാധ്യമ അക്കൗണ്ടിൽ വ്യക്തമാക്കി.
ദോഹ മറൈൻ സ്‌പോർട്‌സ് ക്ലബ്ബും ദോഹ തുറമുഖ അധികൃതരും ചേർന്നാണ് മത്സരം നടത്തുന്നത്. ദോഹ തുറമുഖത്തേക്ക് പ്രവേശിക്കുന്ന ഭാഗത്തെ അൽ ബന്ദാർ ഏരിയയിലാണ് ഇവന്റ്. അൽ മിനയുടെ എതിർവശത്തെ പോർട്ട് ബേസിൻ ആണ് ഫിഷിങ് സോൺ. നാളെയും മറ്റന്നാളും (വെള്ളി, ശനി) ദിവസങ്ങളിലായി ഉച്ചയ്ക്ക് 3 മുതൽ രാത്രി 7 വരെയാണ് മത്സരങ്ങൾ നടത്താൻ തീരുമാനിച്ചിരുന്നത്.
ഒറ്റ സീറ്റുകളുള്ള തോണികൾ വേണം മത്സരത്തിന് ഉപയോഗിക്കാൻ. പരമ്പരാഗത മീൻ പിടിത്ത ഉപകരണങ്ങളും വല, ചൂണ്ട, കൊളുത്ത് എന്നിവ ഉപയോഗിച്ചും മീൻ പിടിക്കാം. 2 ദിവസം കൊണ്ട് ഓരോ മത്സരാർഥികളും പിടിക്കുന്ന മീനുകളുടെ തൂക്കം വിലയിരുത്തിയാണ് വിജയികളെ പ്രഖ്യാപിക്കുക. വിജയികൾക്കും മത്സരത്തിൽ പങ്കെടുക്കുന്നവർക്കും ആകർഷകമായ സമ്മാനങ്ങളുമുണ്ട്.
മറൈൻ ടൂറിസവും കായിക ഇനങ്ങളും പ്രോത്സാഹിപ്പിക്കാൻ ലക്ഷ്യമിട്ടാണ് കയാക് ഫിഷിങ് മത്സരം നടത്തുന്നത്. വേനൽക്കാലത്ത് രാജ്യത്തിന്റെ വിവിധ ഭാഗങ്ങളിലായി നടക്കുന്ന പ്രധാന ഇനങ്ങളിലൊന്നാണ് ചെറുതോണികളിൽ ചൂണ്ടയിട്ട് മീൻ പിടിത്തം.
ഇതുവരെ ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/HHOGGyLPTMH45QRaxZQRyz
