March 12, 2023
March 12, 2023
ന്യൂസ്‌റൂം ബ്യുറോ
ദോഹ : ഖത്തറിൽ സ്പോൺസർഷിപ്പ് നിയമ ഭേദഗതിക്ക് ശേഷം നാല് ലക്ഷം തൊഴിലാളികൾ മറ്റ് തൊഴിലുടമകളുടെ കീഴിലേക്ക് മാറിയതായി ദേശീയ മനുഷ്യാവകാശ സമിതി (എൻഎച്ച്ആർസി) ചെയർപേഴ്സൺ മറിയം ബിൻത് അബ്ദുല്ല അൽ-അത്തിയ അറിയിച്ചു..ആംനസ്റ്റി ഇന്റർനാഷണൽ സെക്രട്ടറി ജനറൽ ആഗ്നസ് കാലമർഡുമായി ലണ്ടനിൽ നടത്തിയ കൂടിക്കാഴ്ചയിലാണ് അവർ ഇക്കാര്യം പറഞ്ഞത്.
ഖത്തറിലെ വിദേശ തൊഴിലാളികളുടെ അവകാശങ്ങളും ജീവിത സാഹചര്യങ്ങളും സംബന്ധിച്ച എൻഎച്ച്ആർസിയുടെ റിപ്പോർട്ടുകളും സ്ഥിതിവിവരക്കണക്കുകളെ അടിസ്ഥാനമാക്കിയുള്ള തുടർനടപടികളും നിയമഭേദഗതിയുടെ ഫലപ്രാപ്തി തെളിയിക്കുന്നതാണെന്നും അവർ ചൂണ്ടിക്കാട്ടി.അതേസമയം,എൻ.എച്.ആർ.സിക്ക് ലഭിച്ച നിവേദനങ്ങളും പരാതികളും വിലയിരുത്തുമ്പോൾ ഭാവിയിൽ പൂർണമായ പ്രശ്‌നപരിഹാരത്തിന് ഇനിയും ചില വെല്ലുവിളികളുണ്ടെന്നും അവർ കൂട്ടിച്ചേർത്തു.
തൊഴിൽ തര്ക്ക പരിഹാര സമിതിയുടെ പ്രവർത്തനങ്ങളും ചില പ്രത്യേക സാഹചര്യങ്ങളിൽ ദുർബല വിഭാഗങ്ങളിൽ പെട്ട തൊഴിലാളികളുടെ വേതന കുടിശിക നൽകാൻ പ്രത്യേക ഫണ്ട് രൂപീകരിച്ചതും അഭിനന്ദനാർഹമായ മുന്നേറ്റമാണ്. തൊഴിലാളികളുടെ വേതന സംരക്ഷണത്തിനായി പ്രത്യേക നിയമം നടപ്പാക്കിയ ഖത്തർ തൊഴിൽ മന്ത്രാലയത്തിന്റെ നടപടിയെയും അവർ പ്രത്യേകം പ്രശംസിച്ചു.
തർക്കങ്ങൾ പരിഹരിക്കാൻ തൊഴിലാളികൾക്ക് ലേബർ ഡിപ്പാർട്ട്‌മെന്റിനെ സമീപിക്കാവുന്നതാണ്.പരാതികൾ സമർപ്പിക്കാനും ബന്ധപ്പെട്ടവരുമായി ആശയവിനിമയം നടത്താനും തൊഴിൽ മന്ത്രാലയം ഇലക്ട്രോണിക് പ്ലാറ്റ്‌ഫോം ആരംഭിച്ചതാണ് സമീപകാല നടപടിക്രമങ്ങളിലെ ഏറ്റവും പ്രധാനപ്പെട്ട മുന്നേറ്റമെന്നും എൻ.എച്.ആർ.സി അധ്യക്ഷ വ്യക്തമാക്കി.തർക്കങ്ങൾ രമ്യമായി പരിഹരിക്കാൻ കഴിയുന്നില്ലെങ്കിൽ തർക്ക പരിഹാര സമിതികളിലേക്ക് റഫർ ചെയ്യുന്നതായും അവർ വിശദീകരിച്ചു.
ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/LiM4EdDAtkTAmYRCb0LMz9
