December 04, 2023
December 04, 2023
ദോഹ: ഖത്തര് വേദിയാകുന്ന 2023 ലെ ലോക അറേബ്യന് കുതിര ചാമ്പ്യന്ഷിപ്പിന് വ്യാഴാഴ്ച തുടക്കമാകും. ഡിസംബര് 7 മുതല് 9 വരെ പഴയ ദോഹ തുറമുഖത്താണ് മത്സരം. 42 വര്ഷങ്ങള്ക്ക് ശേഷം ഇതാദ്യമായാണ് ഫ്രാന്സിന് പുറത്ത് ചാമ്പ്യന്ഷിപ്പ് നടക്കുന്നത്. 21 രാജ്യങ്ങളില് നിന്നുള്ള 150 കുതിരകള് മത്സരത്തില് പങ്കെടുക്കും. ആറ് വിഭാഗങ്ങളിലായി വൈകിട്ട് മൂന്ന് മണി മുതല് പത്ത് മണി വരെയാണ് മത്സരം. മത്സരത്തിന്റെ ടിക്കറ്റുകളെല്ലാം ഇതിനോടകം വിറ്റുതീര്ന്നു. 5000 റിയാല് മുതലാണ് ടിക്കറ്റ് നിരക്ക്.
മത്സരത്തോടനുബന്ധിച്ച് ബുധനാഴ്ച മുതല് ( ഡിസംബര് 6) ഡിസംബര് 9 വരെ ദോഹ പോര്ട്ടിൽ പൊതുജനങ്ങള്ക്ക് നിയന്ത്രണമേര്പ്പെടുത്തും. ഈ ദിവസങ്ങളില് ഉച്ചയ്ക്ക് രണ്ട് മണി മുതല് രാത്രി എട്ട് വരെയാണ് പ്രവേശന നിയന്ത്രണം. അംഗീകൃത ഉദ്യോഗസ്ഥര്ക്ക് മാത്രമാണ് പ്രവേശനമെന്നും അധികൃതര് അറിയിച്ചു. ഹോട്ടല്, റസ്റ്റോറന്റ് റിസര്വേഷനുകളുള്ള വ്യക്തികള്ക്ക് പ്രവേശനം അനുവദിക്കും.
അറേബ്യന് കുതിരകളോടുള്ള ഖത്തറിന്റെ താല്പര്യം പ്രോത്സാഹിപ്പിക്കുന്നതിന് ചാമ്പ്യന്ഷിപ്പ് സഹായകമാകും. അതേസമയം, മത്സരത്തിന്റെ ഒരുക്കങ്ങളെല്ലാം പൂര്ത്തിയായതായി ചാമ്പ്യന്ഷിപ്പ് ഡയറക്ടര് അല് ദാര്വിഷ് പറഞ്ഞു. 2024ല് പാരീസിലാണ് ചാമ്പ്യന്ഷിപ്പ് നടക്കുക. അതേസമയം 2025ല് വീണ്ടും മത്സരത്തിന് ഖത്തര് ആതിഥേയത്വം വഹിക്കും.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/CIEQF0ymerI3E7Kl0Fortt
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F