February 17, 2024
February 17, 2024
ദോഹ: ഖത്തറിൽ തീരുമാനങ്ങൾ എടുക്കുന്ന സ്ഥാനങ്ങളിൽ 30 ശതമാനവും വനിതകളും അവരിൽ 52 ശതമാനത്തിലധികം പേർ പ്രത്യേക പദവികളും വഹിക്കുന്നുണ്ടെന്ന് ശൂറ കൗൺസിൽ ഡെപ്യൂട്ടി സ്പീക്കർ ഹംദ ബിൻത് ഹസൻ അൽ സുലൈത്തി പറഞ്ഞു. സൗത്ത്-സൗത്ത് സഹകരണത്തെക്കുറിച്ചുള്ള പാർലമെൻ്ററി സമ്മേളനത്തോടനുബന്ധിച്ച് മൊറോക്കൻ തലസ്ഥാനമായ റബാത്തിൽ നടന്ന ആഫ്രിക്കയിലെയും അറബ് ലോകത്തെയും വനിതാ പാർലമെൻ്റേറിയൻമാരുടെ യോഗത്തിലാണ് അവർ ഇക്കാര്യം വ്യക്തമാക്കിയത്.
രാജ്യത്ത് ഉയർന്നതും ഫലപ്രദവുമായ പങ്കാളിത്ത സൂചകങ്ങൾ കൈവരിക്കാൻ ഖത്തറി വനിതകൾക്ക് മികച്ച വിദ്യാഭ്യാസം, അക്കാദമിക് നേട്ടം, പൊതുപ്രവർത്തനം വികസിപ്പിക്കാനുമുള്ള യോഗ്യത എന്നിവ നേടാനുള്ള അവസരങ്ങൾ നൽകിയതിനെയും ഡെപ്യൂട്ടി സ്പീക്കർ എടുത്തുപറഞ്ഞു. സമൂഹത്തിൽ സ്ത്രീകളുടെ പങ്കിനെ കുറിച്ചും അവരുടെ രാഷ്ട്രീയ പങ്കാളിത്തം വർധിപ്പിക്കുന്നതിലുള്ള ശ്രദ്ധ, കാഴ്ചപ്പാട്, വിശ്വാസം എന്നിവയെ കുറിച്ചും ഡോ. ഹംദ സംസാരിച്ചു.
ഖത്തറിലെ സ്ത്രീകളെ പിന്തുണയ്ക്കുന്നതിലും വിദ്യാഭ്യാസത്തിലെ ശ്രദ്ധയിലൂടെ മാതൃക നൽകുന്നതിലും ഖത്തർ ഫൗണ്ടേഷൻ ഫോർ എജ്യുക്കേഷൻ, സയൻസ് ആൻഡ് കമ്മ്യൂണിറ്റി ഡെവലപ്‌മെൻ്റ് ഡയറക്ടർ ബോർഡ് ചെയർമാൻ ഷെയ്ഖ മോസ ബിൻത് നാസർ വഹിക്കുന്ന പങ്ക് വലുതാണെന്നും യോഗത്തിൽ അവർ പറഞ്ഞു. സ്ത്രീകൾക്കിടയിൽ അവബോധം പ്രചരിപ്പിക്കുന്നതിൽ ഖത്തർ മാധ്യമങ്ങൾ നൽകുന്ന സംഭാവനയും, പരിശീലന കോഴ്‌സുകൾ, സെമിനാറുകൾ, ബോധവൽക്കരണ പരിപാടികൾ എന്നിവയിലൂടെ വനിതകളുമായി ബന്ധപ്പെട്ട കേന്ദ്രങ്ങളുടെ സംഭാവനയെയും ഡെപ്യൂട്ടി സ്പീക്കർ അഭിനന്ദിച്ചു.
അറബ്, ആഫ്രിക്കൻ മേഖലകളിലെ സ്ത്രീകൾ സമാനമായ വെല്ലുവിളികളും പ്രശ്നങ്ങളും അഭിമുഖീകരിക്കുന്നുണ്ടെന്നും, പങ്കാളിത്തം, സഹകരണം, സംയോജന പദ്ധതികൾ എന്നിവയിലൂടെ അവയെ മറികടക്കാൻ യോജിച്ച ശ്രമങ്ങൾ ആവശ്യമാണെന്നും അവർ ചൂണ്ടിക്കാട്ടി.
കരാറുകൾ സജീവമാക്കാനും അറബ്, ആഫ്രിക്കൻ മേഖലകൾ തമ്മിലുള്ള കോൺഫറൻസുകളുടെയും പങ്കാളിത്ത സംവിധാനങ്ങളുടെയും ശുപാർശകൾ നടപ്പിലാക്കുന്നതിനും അനുഭവങ്ങളും വൈദഗ്ധ്യവും കൈമാറ്റം ചെയ്യാൻ അനുവദിക്കുന്ന കൂടുതൽ മീറ്റിംഗുകൾ സംഘടിപ്പിക്കാനും യോഗത്തിൽ ഡോ. അൽ സുലൈത്തി ആവശ്യപ്പെട്ടു. ആഫ്രിക്കയിലും അറബ് ലോകത്തും വനിതാ പാർലമെൻ്റ് അംഗങ്ങൾക്കായി ഒരു ശൃംഖല സ്ഥാപിക്കുക എന്ന ആശയവും അവർ മുന്നോട്ട് വെച്ചു.
"ആഫ്രിക്കയിലും അറബ് ലോകത്തും വികസനത്തിനും സദ്ഭരണത്തിനും പിന്തുണ നൽകുന്നതിന് വനിതാ പാർലമെൻ്റേറിയൻമാരെ ശാക്തീകരിക്കുക" എന്ന വിഷയത്തിലാണ് യോഗം ചേർന്നത്. എല്ലാ മേഖലകളിലും സ്ത്രീകളുടെ പങ്കാളിത്തം വിപുലപ്പെടുത്തുന്നതിലും ആഫ്രിക്കയിലും അറബ് ലോകത്തും സദ്ഭരണം നടപ്പാക്കുന്നതിലും വികസനം കൈവരിക്കുന്നതിലും അവരുടെ ഫലപ്രദമായ പങ്ക് വർധിപ്പിക്കുന്നതിലും പാർലമെൻ്റുകൾ വഹിക്കുന്ന പ്രധാന പങ്കിനെക്കുറിച്ച് യോഗത്തിൽ പങ്കെടുത്തവർ ചർച്ച ചെയ്തു.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/IocT7PQnr4MEYpMCPpqwIn
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
