November 11, 2023
November 11, 2023
ദോഹ: എട്ടാം ഖത്തര്‍ മലയാളി സമ്മേളനം നവംബര്‍ 17ന് (വെള്ളിയാഴ്ച) രാവിലെ എട്ടുമുതല്‍ രാത്രി 9.30വരെ ആസ്‌പെയര്‍ സ്‌പോര്‍ട്‌സ് സിറ്റിയിലെ ലേഡീസ് സ്‌പോര്‍ട്‌സ് ഹാളില്‍ നടക്കും. നാല് സെഷനുകളായി നടക്കുന്ന സമ്മേളനത്തിന്റെ ഉദ്ഘാടന സെഷനില്‍ ഗോപിനാഥ് മുതുകാട് കുട്ടികളും രക്ഷിതാക്കളുമടങ്ങിയ സദസ്സുമായി സംവദിക്കും. ഉച്ചഭക്ഷണത്തിന് ശേഷം നടക്കുന്ന കുടുംബ സെഷനില്‍ പി എം എ ഗഫൂര്‍, ഡോ. അജു എബ്രഹാം എന്നിവര്‍ പ്രഭാഷണം നടത്തും.
വൈകിട്ട് നടക്കുന്ന മാധ്യമ സെമിനാറില്‍ രാജീവ് ശങ്കരന്‍, റിഹാസ് പുലാമന്തോള്‍ എന്നിവര്‍ സംസാരിക്കും. സമാപന സമ്മേളനം പാണക്കാട് സാദിഖലി ശിഹാബ് തങ്ങള്‍ ഉദ്ഘാടനം ചെയ്യും. സ്വാഗതസംഘം ചെയര്‍മാന്‍ ഷറഫ് പി ഹമീദ് അധ്യക്ഷത വഹിക്കും. കെ.മുരളീധരന്‍ എംപി, ജോണ്‍ ബ്രിട്ടാസ് എംപി, ആലങ്കോട് ലീലാകൃഷ്ണന്‍, ബിഷപ്പ് ഡോ. ഗീവര്‍ഗ്ഗീസ് മാര്‍ കുറഇലോസ്, ഡോ.ജമാലുദ്ദീന്‍ ഫാറൂഖി, ഡോ.മല്ലിക എംജി തുടങ്ങിയവര്‍ സംസാരിക്കും.
കാത്തുവെക്കാം സൗഹൃദതീരം എന്നതാണ് ഇത്തവണത്തെ സമ്മേളനം പ്രമേയം. വിഷയവുമായി ബന്ധപ്പെട്ട ചര്‍ച്ചകളും പ്രഭാഷണങ്ങളും സമ്മേളനത്തില്‍ നടക്കും. സമ്മേളനത്തില്‍ പങ്കെടുക്കുന്നവര്‍ക്കുള്ള ഓണ്‍ലൈന്‍ രജിസ്‌ട്രേഷന്‍ ആരംഭിച്ചു. പ്രവേശനം സൗജന്യമാണ്.
രജിസ്‌ട്രേഷന്‍ ലിങ്ക്: https://tinyuri.com/qmc2023
സമ്മേളനത്തിന്റെ ഒരുക്കങ്ങളെല്ലാം പൂര്‍ത്തിയായതായി സംഘാടകര്‍ പറഞ്ഞു. സംഘാടക സമിതി ചെയര്‍മാന്‍ ഷറഫ് പി ഹമീദ്, ജനറല്‍ കണ്‍വീനര്‍ ഷമീര്‍ വലിയവീട്ടില്‍, മുഖ്യരക്ഷാധികാരി എ പി മണികണ്ഠന്‍, ഉപദേശക സമിതി ചെയര്‍മാന്‍ എബ്രഹാം ജോസഫ്, പബ്ലിസിറ്റി ചെയര്‍മാന്‍ മുഹമ്മദ് സിയാദ്, ഖത്തര്‍ ഇന്ത്യന്‍ ഇസ്‌ലാഹി സെന്റര്‍ പ്രസിഡന്റ് കെ എന്‍ സുലൈമാന്‍ മദനി, ജനറല്‍ സെക്രട്ടറി റഷീദലി വി പി എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/CqJci12yE9VL8MZgKZYvGm
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
