January 10, 2024
January 10, 2024
ദോഹ: ‘ഖത്തർ 2022 ലോകകപ്പ്: യാത്രയും പൈതൃകവും’ എന്ന തലക്കെട്ടിൽ ഖത്തർ ആതിഥേയത്വം വഹിച്ച ഫിഫ ലോകകപ്പിന്റെ പ്രദർശനം ആരംഭിച്ചു. ഖത്തർ നാഷണൽ ലൈബ്രറിയിൽ സുപ്രീം കമ്മിറ്റി ഫോർ ഡെലിവറി ആൻഡ് ലെഗസി സഹമന്ത്രിയും ഖത്തർ നാഷനൽ ലൈബ്രറി പ്രസിഡന്റുമായ ഡോ. ഹമദ് ബിൻ അബ്ദുൽ അസീസ് അൽ കുവാരി, സുപ്രീം കമ്മിറ്റി സെക്രട്ടറി ജനറൽ ഹസൻ അൽ തവാദി തുടങ്ങിയവരാണ് പ്രദർശനം ഉദ്ഘാടനം ചെയ്തത്. ഖത്തർ ഫൗണ്ടേഷന്റെ എജുക്കേഷൻ സിറ്റിയിൽ സ്ഥിതി ചെയ്യുന്ന ലൈബ്രറിയുടെ ദി ബ്രിഡ്ജിൽ ആണ് പ്രദർശനം ഒരുക്കിയിരിക്കുന്നത്.
ലോകകപ്പ് ആതിഥേയത്വത്തിനായുള്ള ബിഡ് മുതൽ ടൂർണമെന്റ് അവസാനം വരെ ലോകകപ്പിന്റെ ചരിത്രം വിവരിക്കുന്നതാണ് പ്രദർശനം. വിപുലമായ ഡോക്യുമെന്റുകൾ, ചിത്രങ്ങൾ, വിഡിയോകൾ എന്നിവയിൽ നിന്ന് ലോകകപ്പിന്റെ സ്ഥിതിവിവരക്കണക്കുകൾ വേർതിരിക്കുന്നതിന് മൈക്രോസോഫ്റ്റുമായി സഹകരിച്ച് വികസിപ്പിച്ച നിർമിതബുദ്ധി സേവനങ്ങളും ലഭ്യമാക്കിയിട്ടുണ്ട്.
‘ഖത്തർ 2022’ ജനങ്ങളെ സ്വാധീനിച്ചതും എല്ലാ മേഖലകളിലും രാജ്യത്തിന്റെ വികസനത്തിൽ വഹിച്ച പങ്കുമെല്ലാം കാണുമ്പോൾ, നമ്മുടെ രാജ്യത്തിന്റെ ചരിത്രത്തിലെ സുപ്രധാന സംഭവം ലൈബ്രറിയിൽ സ്ഥാപിക്കണമെന്ന് ആഗ്രഹിച്ചിരുന്നുവെന്ന് ഡോ. ഹമദ് അൽ കുവാരി പറഞ്ഞു. ലോകകപ്പ് ഖത്തറിനും മുഴുവൻ മേഖലക്കും ഒരു നിർണായക നാഴികക്കല്ലായി എപ്പോഴും സ്മരിക്കപ്പെടും. മഹത്തായ സംഭവത്തിന്റെ സ്മരണിക പ്രദർശിപ്പിക്കാൻ സാധിച്ചതിൽ ഏറെ സന്തോഷമുണ്ടെന്നും അൽ കുവാരി കൂട്ടിച്ചേർത്തു.
പൊതുജനങ്ങൾക്കും, വിവിധ സ്കൂളുകളിൽ നിന്നും സർവകലാശാലകളിൽ നിന്നുമുള്ള വിദ്യാർഥികൾക്കും പ്രദർശനം കാണാനുള്ള സൗകര്യം അധികൃതർ ഉറപ്പാക്കും. ഖത്തറിന്റെ ചരിത്രത്തിലെ പ്രധാന ഏടിനെയാണ് പ്രദർശനം അടയാളപ്പെടുത്തുന്നതെന്ന് സുപ്രീം കമ്മിറ്റി സെക്രട്ടറി ജനറൽ ഹസൻ അൽ തവാദി പറഞ്ഞു. ഭാവി തലമുറകൾക്ക് ലോകകപ്പിനെക്കുറിച്ച് കൂടുതൽ അറിയാനുള്ള അവസരമായിരിക്കും ഇത് നൽകുക. നമ്മുടെ രാജ്യത്തെ പദ്ധതികൾ വേഗത്തിലാക്കാനും ഖത്തറിന്റെയും മേഖലയുടെയും സാധ്യതകൾ പ്രകടിപ്പിക്കാനും സംസ്കാരത്തെ പ്രകടമാക്കാനും ലോകകപ്പ് അവസരം നൽകിയെന്ന് തവാദി പറഞ്ഞു.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/CIEQF0ymerI3E7Kl0Fortt
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F