January 04, 2024
January 04, 2024
ദോഹ: ഫലസ്തീനിനായി ഖത്തർ ഫൗണ്ടേഷനു കീഴിലെ വിദ്യാർഥികൾ രണ്ട് കോടി റിയാലിലേറെ തുക സമാഹരിച്ചു. ഖത്തറിൽ വിവിധ പരിപാടികൾ സംഘടിപ്പിച്ചാണ് തുക സമാഹരിച്ചത്. ഖത്തർ ഫൗണ്ടേഷന് കീഴിൽ വിവിധ സ്കൂളുകളും സ്ഥാപനങ്ങളും ധനശേഖരണത്തിൽ പങ്കുചേർന്നിരുന്നു. കുട്ടികളിൽ പൗരബോധവും സഹാനുഭൂതിയും മാനുഷിക മൂല്യങ്ങളും വളർത്തുക, വേദനിക്കുന്നവേരാട് ഐക്യം പ്രകടിപ്പിക്കുക തുടങ്ങിയ ലക്ഷ്യങ്ങളോടെയാണ് ഫൗണ്ടേഷൻ വിവിധ പരിപാടികൾ സംഘടിപ്പിച്ചത്.
വിദ്യാർഥികളുടെ പ്രവർത്തനങ്ങളെ ഖത്തർ ഫൗണ്ടേഷൻ പ്രീ യൂണിവേഴ്സിറ്റി എജുക്കേഷൻ പ്രസിഡന്റ് അബീർ അൽ ഖലീഫ അഭിനന്ദിച്ചു. ‘ഈ ചെറുപ്പക്കാർ വെറും വിദ്യാർഥികളല്ല; സഹാനുഭൂതിയും ആഗോള പൗരത്വവും സാമൂഹിക ഉത്തരവാദിത്തബോധവും ഉൾക്കൊള്ളുന്ന വളർന്നു വരുന്ന നേതാക്കളാണെന്നതിൽ അഭിമാനിക്കുന്നു. അവരുടെ ശ്രമങ്ങൾ ക്ലാസ്മുറിക്കും അപ്പുറത്തേക്ക് വ്യാപിക്കുന്നു, കരുതലുള്ള വ്യക്തികളെ വികസിപ്പിക്കുന്നതിൽ വിദ്യാഭ്യാസത്തിന്റെ പങ്ക് കാണിക്കുന്നതാണ് ഈ യത്നം’ -അബീർ അൽ ഖലീഫ പറഞ്ഞു.
ഫലസ്തീന്റെ സംസ്കാരവും പാരമ്പര്യവും പ്രദർശിപ്പിക്കുന്ന നൂറ് കലാ സൃഷ്ടികളുടെ പ്രദർശനം, എജുക്കേഷൻ സിറ്റിയിലെ പള്ളിയിൽ ഫലസ്തീനുവേണ്ടിയുള്ള പ്രാർഥന, ഒലീവ് മരങ്ങൾ നട്ടുകൊണ്ട് ഐക്യദാർഢ്യം എന്നിവയും ഫൗണ്ടേഷൻ സംഘടിപ്പിച്ചു. ദോഹ അകാദമി വിദ്യാർഥികൾ മധുരപലഹാര വിൽപനയിലൂടെ 1.39 ലക്ഷം റിയാലും, ഖത്തർ അക്കാദമി അൽ ഖോറിനു കീഴിൽ കലാ,കായിക പരിപാടികളുമായി നടത്തിയ ധനശേഖരണത്തിൽ 13,478 റിയാലും കണ്ടെത്തി. ഖത്തർ അക്കാദമി മുശരിബ് വിദ്യാർഥികൾ തങ്ങൾ നിർമിച്ച ഉൽപന്നങ്ങൾ വിൽപന നടത്തി 11,697 റിയാലാണ് ശേഖരിച്ചത്. സിദ്ര അക്കാദമി വിദ്യാർഥികൾ ‘ഫലസ്തീൻ ഡേ’ ആചരിച്ചു കൊണ്ട് വിവിധ ഉൽപന്നങ്ങളുടെ വിൽപനയിലൂടെ 33,871 റിയാലും സമാഹരിച്ചു. വക്റ അക്കാദമി ‘വൺ ബോഡി’ കാമ്പയിനിലൂടെ 1.41 ലക്ഷം റിയാലും, താരിഖ് ബിൻ സിയാദ് സ്കൂൾ വിദ്യാർഥികൾ ഫലസ്തീൻ ഡ്യൂട്ടി കാമ്പയിനിലൂടെ 5441 റിയാലും കണ്ടെത്തി.
അതേസമയം, ഖത്തർ ദോഹ അക്കാദമിയുടെ നേതൃത്വത്തിൽ ‘സ്റ്റാൻഡ് വിത് ഫലസ്തീൻ’ എന്ന പ്രമേയത്തിൽ സംഘടിപ്പിച്ച സൗഹൃദ ഫുട്ബാൾ മത്സരത്തിൽ 20 ദശലക്ഷം റിയാലാണ് സമാഹരിച്ചത്. അവ്സാജ് അകാദമി നേതൃത്വത്തിൽ ദേശീയ ദിനത്തിൽ 41,336 റിയാലും സമാഹരിച്ചു.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/CIEQF0ymerI3E7Kl0Fortt
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F