March 23, 2024
March 23, 2024
ദോഹ: ഖത്തറിൽ സീസൺ മാറ്റത്തെ തുടർന്ന് ആസ്ത്മ രോഗമുള്ളവർക്ക് നിർദേശങ്ങളുമായി ഖത്തർ പൊതുജനാരോഗ്യ മന്ത്രാലയം. വസന്തകാലത്തുണ്ടാകുന്ന പലവിധ മാറ്റങ്ങൾ ആസ്ത്മ രോഗമുള്ളവരെ ബാധിക്കാൻ സാധ്യതയുണ്ട്. പ്രത്യേകിച്ച് വസന്തകാലത്ത് പലർക്കും പൂമ്പൊടി അലർജി (പൊള്ളെൻ അലർജി) സൃഷ്ടിക്കാറുണ്ട്. ഈ സാഹചര്യത്തിലാണ് ഖത്തർ പൊതുജനാരോഗ്യ മന്ത്രാലയം നിർദേശങ്ങൾ പുറപ്പെടുവിച്ചത്.
ഈ സീസണിൽ പൂക്കൾ, മരങ്ങൾ, പുല്ലുകൾ എന്നിവയിൽ നിന്നുയരുന്ന പൂമ്പൊടിയുമായുള്ള സമ്പർക്കം ആസ്ത്മ ലക്ഷണങ്ങൾ വർദ്ധിപ്പിക്കും. അതിനാൽ അത്തരം സാഹചര്യങ്ങളിൽ ജാഗ്രത പുലർത്തണം. പ്രത്യേകിച്ച് ചൂട് കാറ്റുള്ളപ്പോൾ വീടിനുള്ളിൽ തന്നെ തുടരാൻ ശ്രമിക്കണം. ചൂടുള്ള കാറ്റുള്ള ദിവസങ്ങളിൽ പൂമ്പൊടി കണ്ണിൽ പ്രവേശിക്കുന്നത് തടയാൻ കണ്ണട ധരിക്കുക. ഡ്രൈവ് ചെയ്യുമ്പോൾ കാറിൻ്റെ വിൻഡോകൾ അടയ്ക്കുക. പുല്ലുള്ള സ്ഥലങ്ങളിൽ പോകരുതെന്നും, വീടിനുള്ളിൽ പൂക്കൾ സംരക്ഷിക്കുന്നത് ഒഴിവാക്കണമെന്നും നിർദേശമുണ്ട്. ചൂട് കാറ്റുള്ള ദിവസങ്ങളിൽ വസ്ത്രങ്ങൾ ഉണങ്ങാൻ പുറത്ത് തൂക്കിയിടരുത്. കാരണം, അലർജിക്ക് കാരണമായേക്കാവുന്ന പൂമ്പൊടി വസ്ത്രങ്ങളിൽ പറ്റിനിൽക്കാൻ സാധ്യതയുണ്ട്.
പുറത്തുപോകുമ്പോൾ, ആസ്ത്മയ്ക്കുള്ള പ്രതിരോധ മരുന്നുകൾ കയ്യിൽ കരുതണം. മൃഗങ്ങളുടെയും പക്ഷികളുടെയും കാഷ്ഠം, ജലദോഷം, വീട്ടിലെ പൊടി, ഫാക്ടറികൾക്കും റിഫൈനറികൾക്കും സമീപമുള്ള പുക, ചിലതരം ഭക്ഷണങ്ങൾ എന്നിവയും ആസ്ത്മ വർധിക്കാൻ കാരണമാകാറുണ്ട്.
പഠനം അനുസരിച്ച് ഖത്തറിലെ 9 ശതമാനം മുതിർന്നവരിലും ആസ്ത്മ ഉണ്ടാവാറുണ്ട്. ഖത്തറിലും ഗൾഫ് രാജ്യങ്ങളിലും ഏറ്റവും കൂടുതൽ ബാധിക്കുന്ന രോഗമാണ് ആസ്ത്മയെന്നും പഠനത്തിൽ പറയുന്നു. രാജ്യത്തെ പാരിസ്ഥിതികവും കാലാനുസൃതവുമായ മാറ്റങ്ങളുടെ പശ്ചാത്തലത്തിൽ ഫലപ്രദമായി രോഗാവസ്ഥയെ കൈകാര്യം ചെയ്യണമെന്ന് മന്ത്രാലയം അറിയിച്ചു. ഖത്തറിലെ ഊഷ്മളമായ താപനില, ഈർപ്പം, പൊടി എന്നിവ ആസ്ത്മ വർദ്ധിപ്പിക്കാൻ കാരണമാകുമെന്നും മന്ത്രാലയം മുന്നറിയിപ്പ് നൽകി. എല്ലാ ആരോഗ്യ കേന്ദ്രങ്ങളിലും ലഭ്യമായ ഇൻഫ്ലുവൻസ വാക്സിനുകളും ന്യൂമോകോക്കൽ വാക്സിനുകളും എടുക്കുന്നത് ഉചിതമാണെന്നും മന്ത്രാലയം കൂട്ടിച്ചേർത്തു.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/IocT7PQnr4MEYpMCPpqwIn
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
