January 14, 2024
January 14, 2024
ദോഹ: ഖത്തറിൽ ടെറ്റനസ്, ഡിഫ്തീരിയ, ചുമ (Tdap) എന്നിവയ്ക്കെതിരായ വാർഷിക വാക്സിനേഷൻ കാമ്പയിൻ ആരംഭിക്കുന്നതായി പൊതുജനാരോഗ്യ മന്ത്രാലയം അറിയിച്ചു. വിദ്യാഭ്യാസ മന്ത്രാലയത്തിന്റെയും പ്രാഥമികാരോഗ്യ കോർപ്പറേഷന്റെയും സഹകരണത്തോടെ നാളെ (ജനുവരി 15) മുതൽ സ്വകാര്യ സ്കൂളുകളിലും ജനുവരി 28 മുതൽ സർക്കാർ സ്കൂളുകളിലും വാക്സിനേഷൻ ആരംഭിക്കുമെന്ന് മന്ത്രാലയം വ്യക്തമാക്കി.
ഈ വർഷം ഖത്തറിലെ പ്രൈവറ്റ്, പബ്ലിക് സ്കൂളുകളിലെ പത്താം ക്ലാസ്സിലെ വിദ്യാർത്ഥികൾക്കാണ് വാക്സിനേഷൻ നൽകാൻ കാമ്പയിൻ ലക്ഷ്യമിടുന്നത്. ഈ മൂന്ന് രോഗങ്ങൾക്കെതിരെയുള്ള വാക്സിനേഷൻ 10 വർഷത്തിലൊരിക്കൽ ബൂസ്റ്റർ ഡോസായി എടുക്കണമെന്ന് ലോകാരോഗ്യ സംഘടനയും (WHO) നിർദേശിച്ചിട്ടുണ്ട്.
"ക്യാമ്പയിനിലൂടെ വിദ്യാർത്ഥികളുടെ പ്രതിരോധശേഷി വർദ്ധിപ്പിക്കുകയാണ് ലക്ഷ്യമിടുന്നത്. ഖത്തറിൽ നിലവിൽ ടെറ്റനസ്, ഡിഫ്തീരിയ, ചുമ എന്നിവ സ്ഥിരീകരിച്ചിട്ടില്ല. വാക്സിനേഷനാണ് ഇതിന് കാരണം. എന്നിരുന്നാലും, ഈ മൂന്ന് രോഗങ്ങളുടെ ഗൗരവം പൊതുജനങ്ങളുടെ ശ്രദ്ധയിൽപ്പെടേണ്ടതുണ്ട്. ഇവയിലേതെങ്കിലും ബാധിച്ച വ്യക്തിക്ക് മരണം അല്ലെങ്കിൽ പൂർണ്ണ വൈകല്യം ഉൾപ്പെടെയുള്ള ഗുരുതരമായ സങ്കീർണതകൾ ഉണ്ടാക്കാം," - പൊതുജനാരോഗ്യ മന്ത്രാലയത്തിലെ ഹെൽത്ത് പ്രൊട്ടക്ഷൻ ആൻഡ് കമ്മ്യൂണിക്കബിൾ ഡിസീസ് കൺട്രോൾ ഡിപ്പാർട്ട്മെന്റ് ഡയറക്ടർ ഡോ. ഹമദ് അൽ റുമൈഹി പറഞ്ഞു.
ഈ വാക്സിൻ പുതിയതല്ലെന്നും, ചൈൽഡ് വാക്സിനേഷൻ പ്രോഗ്രാമിന്റെ ഭാഗമാണെന്നും, പ്രാദേശികമായും അന്തർദ്ദേശീയമായും മിക്ക കോളേജുകൾക്കും പ്രവേശനത്തിന് മുമ്പുള്ള ആവശ്യകതയാണ് ഇതെന്നും ഡോ. അൽ-റുമൈഹി വ്യക്തമാക്കി. കുട്ടികളുടെ ആരോഗ്യം വർദ്ധിപ്പിക്കുന്നതിലും ഡിഫ്തീരിയ, ടെറ്റനസ്, ചുമ എന്നിവയിൽ നിന്ന് അവരെ സംരക്ഷിക്കുന്നതിലും കാര്യമായ സ്വാധീനം ചെലുത്തുന്നതിനാൽ കുട്ടികളെ വാക്സിൻ എടുക്കാൻ പ്രോത്സാഹിപ്പിക്കണമെന്ന് മാതാപിതാക്കളോടും അദ്ദേഹം അഭ്യർത്ഥിച്ചു.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/KIGk615xlF1ILlMGxpUXqI
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F