September 07, 2023
September 07, 2023
ദോഹ: അറബ് പാർലമെന്റുകളുടെ സെക്രട്ടറി ജനറൽമാരുടെ പത്താം സമ്മേളനത്തിന് ഖത്തർ ആതിഥേയത്വം വഹിക്കും. 2023 സെപ്റ്റംബർ 12-13 തീയതികളിലാണ് സമ്മേളനം നടക്കുന്നത്. അറബ് പാർലമെന്ററി പ്രതിനിധികൾക്കൊപ്പം 80-ലധികം സെക്രട്ടറി-ജനറലുകളും ലെജിസ്ലേറ്റീവ് കൗൺസിലുകളുടെ പ്രതിനിധികളും സംഘടനകളും യൂണിയനുകളും സമ്മേളനത്തിൽ പങ്കെടുക്കുന്നതായിരിക്കും. ഖത്തറിലെ ശൂറ കൗൺസിലാണ് സമ്മേളനം സംഘടിപ്പിക്കുന്നത്.
അൾജീരിയ, ബഹ്റൈൻ, കൊമോറോസ്, ജിബൂട്ടി, ഈജിപ്ത്, ഇറാഖ്, ജോർദാൻ, കുവൈത്ത്, ലെബനൻ, ലിബിയ, മൗറിറ്റാനിയ, മൊറോക്കോ, ഒമാൻ, പലസ്തീൻ, ഖത്തർ, സൗദി അറേബ്യ, സൊമാലിയ, സുഡാൻ, സിറിയ, ടുണീഷ്യ, യുണൈറ്റഡ് അറബ് എമിറേറ്റ്സ്, യെമൻ എന്നിവരാണ് അറബ് പാർലിമെന്റ് അംഗങ്ങൾ. അസോസിയേഷന്റെ പ്രവർത്തനങ്ങൾ, സാമ്പത്തിക ബജറ്റ്, ഭാവി പ്രവർത്തനങ്ങൾ തുടങ്ങിയ നിരവധി വിഷയങ്ങൾ സമ്മേളനത്തിൽ ചർച്ച ചെയ്യും. സമ്മേളനത്തിന് മുന്നോടിയായി അസോസിയേഷൻ എക്സിക്യൂട്ടീവ് കമ്മിറ്റിയുടെ 39-ാമത് യോഗവും നടക്കും.
അതേസമയം, അറബ് പാർലമെന്റുകളുടെ അസോസിയേഷൻ ഓഫ് സെക്രട്ടറി-ജനറൽമാരുടെ പ്രസിഡന്റ് സ്ഥാനം ഖത്തറിനാണ്. കഴിഞ്ഞ വർഷം ഫെബ്രുവരിയിൽ കെയ്റോയിൽ (ഈജിപ്ത്) നടന്ന യോഗത്തിൽ ഖത്തറിന്റെ പ്രതിനിധിയായ ഡോ. അഹമ്മദ് ബിൻ നാസർ അൽ ഫദലയെയാണ് അറബ് പാർലിമെന്റ് അസോസിയേഷൻ പ്രസിഡന്റായി തിരഞ്ഞെടുത്തത്.
ന്യൂസ്റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/7iFkiXrjqZbE8gsI6yASj9