January 05, 2022
January 05, 2022
ദോഹ : ഖത്തറിൽ കോവിഡ് പരിശോധനാ ഫലം ലഭിക്കാൻ കാലതാമസമെടുക്കുന്ന സാഹചര്യത്തിൽ പി.സി.ആർ പരിശോധനകൾക്ക് കൂടുതൽ നിബന്ധനകൾ ഏർപ്പെടുത്താൻ ഹമദ് മെഡിക്കൽ കോർപറേഷൻ ആലോചിക്കുന്നതായി റിപ്പോർട്ട്. അൻപത് വയസിൽ താഴെ പ്രായമുള്ള, ബൂസ്റ്റർ ഡോസ് എടുക്കുകയോ രണ്ടാം ഡോസ് എടുത്ത് നാല് മാസം കഴിയുകയോ ചെയ്യാത്ത ആളുകൾക്ക് ഇനി പി.സി.ആർ പരിശോധന നടത്താൻ തൽകാലം അനുമതിയുണ്ടാവില്ല. ഇവർ രോഗികളുമായി അടുത്ത് ഇടപഴകിയിട്ടുണ്ടെങ്കിൽ പോലും, തിരിച്ച് വീടുകളിലേക്ക് അയക്കാനാണ് മന്ത്രാലയം ഒരുങ്ങുന്നതെന്ന് ദോഹ ന്യൂസ് റിപ്പോർട്ട് ചെയ്തു. അതേസമയം,ഖത്തറിൽ നിന്നും പുറത്തേക്ക് യാത്ര ചെയ്യുന്നവർക്ക് പി.സി.ആർ പരിശോധന അനുവദിക്കും.ഇതുസംബന്ധിച്ച സർക്കുലർ കഴിഞ്ഞ ദിവസം ഹമദ് മെഡിക്കൽ കോർപറേഷന് കീഴിലെ വിവിധ ഘടകങ്ങൾക്ക് നൽകിയിട്ടുണ്ട്.
ഗുരുതരമായ രോഗമുള്ളവർ, അൻപത് വയസ്സ് കഴിഞ്ഞവർ, ബൂസ്റ്റർ ഡോസിന് സമയമായിട്ടും സ്വീകരിക്കാത്തവർ തുടങ്ങിയ വിഭാഗങ്ങൾക്ക് മാത്രമായിരിക്കും പി.സി.ആർ പരിശോധനക്ക് അനുമതിയുണ്ടാവുക.എന്നാൽ പുറത്തുനിന്ന് രാജ്യത്തേക്ക് പുതുതായി എത്തുന്നവർക്ക് തുടർന്നും പി.സി.ആർ പരിശോധന നടത്തും. ഇതുസംബന്ധിച്ച ഔദ്യോഗിക അറിയിപ്പൊന്നും ഹമദ് മെഡിക്കൽ കോർപറേഷൻ ഇതുവരെ പുറത്തുവിട്ടിട്ടില്ല.
കോവിഡ് വ്യാപനം ശക്തമായതോടെ,പി.സി.ആർ പരിശോധനക്കെത്തുന്നവരുടെ എണ്ണം ഗണ്യമായി ഉയർന്നതാണ് പി.സി.ആർ പരിശോധനാ ഫലം വൈകാൻ ഇടയാക്കിയത്.അത്യാവശ്യമായി നാട്ടിലേക്ക് യാത്രചെയ്യേണ്ടവർക്ക് പോലും 48 മണിക്കൂർ കഴിഞ്ഞിട്ടും പരിശോധനാ ഫലം ലഭിക്കാത്തത് വലിയ പ്രതിസന്ധിയായി തുടരുകയാണ്.നേരിയ രോഗലക്ഷണങ്ങളുള്ളവർ ആന്റിജൻ പരിശോധന നടത്തിയാൽ മതിയെന്നും പി.സി.ആർ പരിശോധന നടത്തേണ്ടതില്ലെന്നും ആരോഗ്യമന്ത്രാലയം ഈയിടെ അറിയിച്ചിരുന്നു.ഈ സാഹചര്യത്തിലും പി.സി.ആർ പരിശോധനക്കെത്തുന്നവരുടെ എണ്ണം കൂടുന്നതിനാലാണ് കൂടുതൽ നിയന്ത്രണങ്ങൾ ഏർപെടുത്താൻ എച്.എം.സി നീക്കം തുടങ്ങിയത്.
ന്യൂസ്‌റൂം വാർത്തകൾ ലഭിക്കാൻ ഈ ലിങ്കിൽ(https://www.facebook.com/groups/Newsroomclub) ക്ലിക്ക് ചെയ്ത് ന്യൂസ്‌റൂം എഫ്.ബി പേജിൽ അംഗമാവുക.വാട്സ്ആപ്പിൽ വാർത്തകൾ ലഭിക്കാൻ 00974 33450597 വാട്സ്ആപ് നമ്പറിൽ സന്ദേശമയക്കുക
