July 18, 2023
July 18, 2023
ന്യൂസ്റൂം ബ്യുറോ
ദോഹ: ഖത്തറിൽ അല്ഹന പ്രതിഭാസത്തെ തുടർന്ന് ഞായറാഴ്ച മുതല് കുതിച്ചുയര്ന്ന വേനല്ച്ചൂട് ബുധൻ, വ്യാഴം ദിവസങ്ങളില് 49 ഡിഗ്രി സെല്ഷ്യസിലെത്തുമെന്ന് കാലാവസ്ഥ വിഭാഗം അറിയിച്ചു.
തിങ്കളാഴ്ച പുറത്തുവിട്ട കാലാവസ്ഥ റിപ്പോര്ട്ട് പ്രകാരം ഈയാഴ്ചയിലെ വരും ദിനങ്ങളില് ചൂട് വര്ധിക്കും. ബുധനാഴ്ച 43-47 ഡിഗ്രി സെല്ഷ്യസിലേക്കും വ്യാഴാഴ്ച 47-49 ഡിഗ്രി സെല്ഷ്യസിലേക്കും അന്തരീക്ഷ താപനില ഉയരും. സമീപകാലത്ത് ഖത്തറിലെ ഏറ്റവും ഉയര്ന്ന താപനില കൂടിയാണിത്.
ചൂടും ഹുമിഡിറ്റിയും വര്ധിക്കുന്നതിന്റെ അടയാളമായ അല്ഹന നക്ഷത്രം ഞായറാഴ്ച ഉദിച്ചുയര്ന്നതായി കാലാവസ്ഥ വിഭാഗം നേരേത്ത അറിയിച്ചിരുന്നു. ഇതിന്റെ തുടര്ച്ചയായി 13 ദിവസങ്ങളില് ക്രമാനുഗതമായി വര്ധിക്കുമെന്നും അറിയിച്ചു. 47 ഡിഗ്രിയായിരുന്നു തിങ്കളാഴ്ച ദോഹയില് രേഖപ്പെടുത്തിയ താപനില.
ചൂടും ഈർപ്പവും വർധിക്കുന്നത് പലതരത്തിലുള്ള സൂര്യാഘാതമടക്കമുള്ള ആരോഗ്യപ്രശ്നങ്ങൾക്ക് കാരണമാകുമെന്ന് എച്ച്എംസിയിലെ എമർജൻസി വിഭാഗം മെഡിക്കൽ റസിഡന്റ് ഡോ ഐഷ അലി അൽ സാദ നേരത്തെ മുന്നറിയിപ്പ് നൽകിയിരുന്നു. ഹീറ്റ് സ്ട്രോക്കിന്റെ ലക്ഷണങ്ങൾ തിരിച്ചറിയാനും പ്രതിരോധിക്കാനുള്ള നിർദേശങ്ങളും അവർ ട്വിറ്ററിൽ പങ്കുവെച്ചിട്ടുണ്ട്.
ആരോഗ്യകരമായ മുന്നറിയിപ്പ്
കുട്ടികളും പ്രായമായവരും വിട്ടുമാറാത്ത രോഗങ്ങളുള്ള രോഗികളും ഈ കാലയളവിൽ ആരോഗ്യ കാര്യങ്ങളിൽ പ്രത്യേകം ശ്രദ്ധ പുലർത്തണം. തണുത്ത വെള്ളത്തിൽ കുളിക്കുന്നതോ തണുത്ത പാഡുകൾ ഉപയോഗിക്കുന്നതോ ശരീരത്തിന്റെ ഊഷ്മാവ് കുറക്കുന്നതിന് സഹായിക്കും. സൂര്യാഘാതമുണ്ടായാൽ, വ്യക്തിയെ ഉടൻ തന്നെ തണുത്ത സ്ഥലത്തേക്ക് മാറ്റുക, തലയും തോളും ഉയർത്തി വ്യക്തിയെ അവന്റെ/അവളുടെ പിൻവശത്തായി കിടത്തുക.ശേഷം തണുത്ത വെള്ളമോ ഐസ്ഡ് പാനീയമോ നൽകുകയും തണുത്ത പാഡുകൾ ധരിപ്പിക്കുകയും ചെയ്യണം.30 മിനിറ്റിന് ശേഷവും അവസ്ഥ മെച്ചപ്പെടുന്നില്ലെങ്കിലോ ശരീര താപനില 40 ഡിഗ്രിയിൽ കൂടുതലാണെങ്കിലോ 999-ലേക്ക് വിളിക്കണമെന്നും ഡോ അൽ സദ കൂട്ടിച്ചേർത്തു.
ന്യൂസ്റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/FZrPbBIed7U4lm5VsQzYgH