January 22, 2023
January 22, 2023
ന്യൂസ്‌റൂം ബ്യുറോ
ദോഹ : ഖത്തർ ലോകകപ്പിനിടെ “വൺ ലവ് ആംബാൻഡ്” ധരിച്ചത് ഫിഫയോടുള്ള പ്രതിഷേധം അറിയിക്കാനായിരുന്നുവെന്നും ഖത്തറിനോടുള്ള പ്രതിഷേധമായിരുന്നില്ലെന്നും ജർമ്മൻ ആഭ്യന്തര മന്ത്രി നാൻസി ഫൈസർ.ഇതുമായി ബന്ധപ്പെട്ട് ഉയർന്ന പ്രതിഷേധങ്ങൾക്കുള്ള മറുപടിയായാണ് അവർ ഇക്കാര്യത്തിൽ വിശദീകരണം നൽകിയത്.
പുതുതായി നിയമിതനായ ജർമൻ ദേശീയ ടീം മാനേജർ റൂഡി വോളർക്ക് നൽകിയ സ്വീകരണത്തിനിടെയായിരുന്നു ആഭ്യന്തര മന്ത്രിയുടെ മറുപടി.ഫെയ്‌സറിന്റെ പ്രതിഷേധത്തെ അഭിസംബോധന ചെയ്ത് വോളർ ഇത്തരം പ്രതിഷേധങ്ങൾ ഒഴിവാക്കണമെന്ന് മന്ത്രിയോട് നിർദേശിച്ചിരുന്നു.
“റൂഡി വോളർ ഫിഫയ്ക്ക് വേണ്ടി പ്രവർത്തിക്കുമെന്ന് ഞാൻ കരുതുന്നില്ല. എന്റെ പ്രതിഷേധം ഫിഫയ്‌ക്കെതിരെയായിരുന്നു, ഖത്തറിനെതിരെയല്ല,” നാൻസി ഫൈസർ വിശദീകരിച്ചു.
ലോകകപ്പിന് മുമ്പ് തന്നെ ഖത്തറിനെ ആതിഥേയ രാജ്യമായി തെരഞ്ഞെടുത്തതിനെ കുറിച്ച് മോശം പരാമർശം നടത്തിയ ആഭ്യന്തര മന്ത്രിയുടെ നടപടി,ദോഹയും ബെർലിനും തമ്മിലുള്ള ബന്ധത്തിൽ ആഴ്ചകളോളം വിള്ളൽ വീഴ്ത്തിയിരുന്നു.പിന്നീട് അഭിപ്രായം തിരുത്തിയെങ്കിലും ജർമനിയുടെ ജപ്പാനെതിരായ മത്സരത്തിനിടെ നാൻസി ഫൈസർ ആംബാൻഡ് ധരിച്ചെത്തിയത് വലിയ പ്രതിഷേധങ്ങൾക്ക് ഇടയാക്കിയിരുന്നു.ഉൽഘാടന മൽസരത്തിനിടെ,ജർമൻ താരങ്ങൾ മൂക്ക് പൊത്തി പ്രതിഷേധിച്ചതും ലോകമെമ്പാടുമുള്ള ഫുട്‍ബോൾ ആരാധകർക്കിടയിൽ കടുത്ത പ്രതിഷേധം വിളിച്ചുവരുത്തി.അതേസമയം,ഖത്തർ ലോകകപ്പിൽ നിന്ന് നാണം കെട്ട തോൽവി ഏറ്റുവാങ്ങിയാണ് ജർമൻ ടീം പുറത്തായത്.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/JSu55PzLuSjIOAiVOpZz2i എന്ന ലിങ്കിൽ ജോയിൻ ചെയ്യുക
