September 20, 2020
September 20, 2020
ദോഹ : ഡിസംബറില്‍ ഖത്തറില്‍ നടക്കാനിരിക്കുന്ന ഫിഫ ക്ലബ് ലോകകപ്പ്-2020 നിലവിലെ കോവിഡ്-19 സാഹചര്യത്തില്‍ മാറ്റിവച്ചേക്കുമെന്ന് ഫിഫ അധ്യക്ഷൻ ജിയാനി ഇൻഫാന്റിനോ പറഞ്ഞു.സാഹചര്യങ്ങള്‍ സൂക്ഷ്മമായി വിലയിരുത്തിവരികയാണെന്നും അടുത്ത വര്‍ഷം ആദ്യമായിരിക്കും ചിലപ്പോള്‍ ക്ലബ്ബ് ലോകകപ്പ് മത്സരം നടത്തുകയെന്നും അദ്ദേഹം സൂചിപ്പിച്ചു. 7 ക്ലബുകളുമായുള്ള ഫിഫ ക്ലബ് ലോകകപ്പിന്റെ അവസാന മത്സരം കൂടിയാണ് ഖത്തറില്‍ നടക്കാനിരിക്കുന്നത്. 2021 മുതല്‍ ഫിഫ ക്ലബ് ലോകകപ്പില്‍ 24 ടീമുകളായിരിക്കും മത്സര രംഗത്തുണ്ടാകുക.
2019ലെ ഫിഫ ക്ലബ് ലോകകപ്പിന്റെ വേദിയും ഖത്തര്‍ ആയിരുന്നു. 2019 ല്‍ കാണികളുടെ മികച്ച പങ്കാളിത്തത്തോടെ 7 ക്ലബ്ബുകളുടെ ആവേശകരമായ പോരാട്ടത്തിനാണ് ഖത്തര്‍ വേദിയൊരുക്കിയത്. ബ്രസീലിന്റെ സിആര്‍ ഫ്‌ലെമംഗോയും ഇംഗ്ലണ്ടിന്റെ ലിവര്‍ പൂളും തമ്മില്‍ നടന്ന ഫൈനല്‍ മത്സരത്തില്‍ എതിരില്ലാത്ത ഒരു ഗോളിനാണ് ലിവര്‍പൂള്‍ കിരീടം നേടിയത്.വരുന്ന ഡിസംബറിലാണ് 2020 ഫിഫ ക്ലബ്ബ് ലോകകപ്പ് ദോഹയിൽ നടത്താൻ നിശ്ചയിച്ചിരുന്നത്.
അതേസമയം,ഏറ്റവും അവിസ്മരണീയമായ ലോകകപ്പായിരിക്കും 2022 ല്‍ ഖത്തര്‍ ലോകത്തിന് സമ്മാനിക്കുകയെന്ന് ഫിഫ അധ്യക്ഷൻ പ്രത്യാശ പ്രകടിപ്പിച്ചു.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200167 എന്ന വാട്സ്ആ പ് നമ്പറിലേക്ക് സന്ദേശമയക്കുക
