March 03, 2023
March 03, 2023
ന്യൂസ്‌റൂം ബ്യുറോ
ദോഹ : വരും ദിവസങ്ങളിൽ ലോകം മറ്റൊരു സുപ്രധാന ഭൂകമ്പത്തിന് സാക്ഷ്യം വഹിക്കുമെന്നും ഗൾഫ് മേഖലയിൽ മാർച്ച് മാസം നിര്ണായകമാണെന്നുമുള്ള ഡച്ച് ഭൂകമ്പ ശാസ്ത്രജ്ഞൻ ഫ്രാങ്ക് ഹൂഗർബീറ്റ്സിന്റെ പ്രവചനം നിഷേധിച്ച് ഖത്തറിലെ ഭൗമ ശാസ്ത്രജ്ഞൻ രംഗത്തെത്തി.ഹൂഗർബീറ്റ്സിന്റെ പ്രവചനം അടിസ്ഥാനരഹിതവും തെറ്റിദ്ധാരണാജനകവുമാണെന്ന് ഖത്തറിലെ നാച്ചുറൽ ഹസാർഡ് എൻവയോൺമെന്റ് ആൻഡ് എനർജി റിസർച്ച് ഇൻസ്റ്റിറ്റ്യൂട്ടിന്റെ (ക്യുഇഇആർഐ) പ്രോഗ്രാം ഡയറക്ടറും പ്ലാനറ്ററി സയന്റിസ്റ്റുമായ ഡോ. എസ്സാം ഹെഗ്ഗി ദോഹ ന്യൂസിനോട് പറഞ്ഞു.
"നെതർലാൻഡിൽ നിന്നുള്ള ഈ ശാസ്ത്രജ്ഞൻ പറയുന്നത് ശാസ്ത്രവുമായി ഒരു ബന്ധവുമില്ലാത്ത കാര്യമാണെന്ന് പൂർണ്ണ ആത്മവിശ്വാസത്തോടെ എനിക്ക് പറയാൻ കഴിയും," ഡോ. എസ്സാം ഹെഗ്ഗി പറഞ്ഞു.
കഴിഞ്ഞ മാസം തുർക്കിയിലും സിറിയയിലും ഉണ്ടായ വിനാശകരമായ ഭൂകമ്പങ്ങൾ പ്രവചിച്ചതിന് ശേഷം ഡച്ച് ഭൂകമ്പ ശാസ്ത്രജ്ഞൻ ഫ്രാങ്ക് ഹൂഗർബീറ്റ്സ് അന്താരാഷ്ട്ര പ്രശസ്തിയും നേടിയിരുന്നു.ആകാശഗോളങ്ങളുടെ ചലനങ്ങളെ അടിസ്ഥാനമാക്കിയുള്ള തന്റെ പ്രവചനങ്ങളെ അടിസ്ഥാനമാക്കി മാർച്ച് ആദ്യവാരം ഗൾഫ് മേഖലയിൽ അങ്ങേയറ്റം നിർണായകമാകുമെന്ന് അദ്ദേഹം തിങ്കളാഴ്ച യുട്യൂബിൽ പോസ്റ്റ് ചെയ്ത ഒരു വീഡിയോയിൽ മുന്നറിയിപ്പ് നൽകിയിരുന്നു.ഈ പ്രവചനം പൂർണമായും തള്ളിക്കളയുകയാണ് ഡോ. എസ്സാം ഹെഗ്ഗി.
“ഗ്രഹങ്ങളുടെ വിന്യാസത്തിലൂടെ നിങ്ങൾക്ക് ഭൂകമ്പങ്ങൾ പ്രവചിക്കാനോ സമയവും കാലവും കൃത്യമായി നിര്ണയിക്കാനോ കഴിയില്ല..ഭൂകമ്പത്തിന്റെ വ്യാപ്തി മാത്രമേ നമുക്ക് മനസ്സിലാക്കാൻ കഴിയൂ.അവ എവിടെയാണ് സംഭവിക്കുന്നതെന്ന് മനസിലാക്കാൻ കഴിയുമെങ്കിലും അവ സംഭവിക്കുന്ന സമയം പ്രവചിക്കാൻ കഴിയില്ല."-അദ്ദേഹം പറഞ്ഞു.
ഡച്ച് ശാസ്ത്രജ്ഞൻ ഇടയ്ക്കിടെ ഇത്തരം മുന്നറിയിപ്പുകൾ നൽകിയിട്ടുണ്ടെങ്കിലും അതെല്ലാം പലപ്പോഴും സജീവമായ ഭൂകമ്പ സാധ്യതയുള്ള സ്ഥലങ്ങളുടെയും സമയത്തിന്റെയും പരിധിക്കുള്ളിലായിരുന്നുവെന്നാണ് ഡോ. എസ്സാം ഹെഗ്ഗി വിശദീകരിക്കുന്നത്.
ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/LiM4EdDAtkTAmYRCb0LMz9
