May 19, 2023
May 19, 2023
ന്യൂസ്റൂം ബ്യുറോ
ദോഹ: ഇന്ത്യയും ഖത്തറും തമ്മിലെ നയതന്ത്ര ബന്ധത്തിന്റെ സുവര്ണ ജൂബിലി ആഘോഷങ്ങളുടെ ഭാഗമായി ഇന്ത്യന് കള്ച്ചറല് സെന്റര് സംഘടിപ്പിക്കുന്ന 'ഭാരത് ഉത്സവ്' ആഘോഷം ഇന്ന് ഖത്തര് നാഷനല് കണ്വെന്ഷന് സെന്ററിൽ അരങ്ങേറും.
ക്യു.എന്.സി.സിയിലെ അല് മയാസ തിയറ്ററില് വൈകുന്നേരം ആറ് മുതല് രാത്രി 10 വരെയാണ് വിവിധ കലാപരിപാടികളുമായി 'ഭാരതോത്സവം' നടക്കുന്നത്. നാലു മണിക്കൂര് നീളുന്ന ആഘോഷ രാവിലേക്ക് 2,500 പേരെ പ്രതീക്ഷിക്കുന്നതായി സംഘാടകര് അറിയിച്ചു.
ഇന്ത്യന് എംബസി ഷെര്ഷെ ഡി അഫയേഴ്സ് ആഞ്ജലീന പ്രേമലത ഉദ്ഘാടനം ചെയ്യും. ഖത്തറിലെ വിവിധ എംബസികളിലെ നയതന്ത്ര പ്രതിനിധികള്, ഖത്തര് സര്ക്കാറിലെ പ്രധാന വ്യക്തിത്വങ്ങള് എന്നിവര് വിശിഷ്ടാതിഥികളായെത്തും. ദോഹയിലെ ഇന്ത്യന് പ്രവാസി സമൂഹത്തിലെ സാമൂഹിക, സാംസ്കാരിക, കലാ, ബിസിനസ് രംഗത്തുള്ളവര്, മാധ്യമ പ്രതിനിധികള്, ഇന്ത്യന് എംബസി എപ്പെക്സ് സംഘടനാ ഭാരവാഹികള്, വിവിധ പ്രവാസി അസോസിയേഷന് ഭാരവാഹികള്, കമ്യൂണിറ്റി അംഗങ്ങള് തുടങ്ങി ക്ഷണിക്കപ്പെട്ട രണ്ടായിരത്തി അഞ്ഞൂറോളം പേര് ഭാരത് ഉത്സവത്തില് പങ്കെടുക്കുമെന്ന് ഐ.സി.സി പ്രസിഡന്റ് എ.പി. മണികണ്ഠന് വ്യക്തമാക്കി.
ഐ.സി.സി അനുബന്ധ സംഘടനകള് അവതരിപ്പിക്കുന്ന ഇന്ത്യയുടെ വിവിധ സംസ്ഥാനങ്ങളിലെ പരമ്ബരാഗത കലാ, സംഗീത, നൃത്ത പരിപാടികളാണ് ഭാരത് ഉത്സവിന്റെ പ്രത്യേകത.
നാലു മണിക്കൂര് മികച്ച ദൃശ്യവിരുന്നിന് പുറമെ ഇന്ത്യയുടെ സാംസ്കാരിക, കലാ പൈതൃകത്തെ അടുത്തറിയാം എന്നതുമാണ് ഭാരത് ഉത്സവിന്റെ സവിശേഷത.
ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/CnQu0Sm89HsFGubs4fWsFe