October 13, 2019
October 13, 2019
ദോഹ: ദോഹ സെൻട്രലിലും വെസ്റ്റ് ബേയിലും ഓഫ് സ്ട്രീറ്റ്, ഓൺ സ്ട്രീറ്റ് കാർ പാർക്കിങ് കേന്ദ്രങ്ങൾ വികസിപ്പിക്കുന്നു. പൊതുമരാമത്ത് അതോറിറ്റിയായ അശ്ഗാലിന്റെ നേതൃത്വത്തിൽ പൊതു-സ്വകാര്യ പങ്കാളിത്തത്തോടെയാണ് പദ്ധതി നടപ്പാക്കുന്നത്.
ദോഹ സൗന്ദര്യവൽക്കരണ പദ്ധതിയുടെ ഭാഗമായാണ് കാർ പാർക്കിങ് കേന്ദ്രങ്ങൾ ഒരുക്കുന്നത്. നിയന്ത്രിത രൂപത്തിലുള്ള കേന്ദ്രങ്ങൾ ഒരുക്കിയാൽ നിയമവിരുദ്ധ പാർക്കിങ് ഒഴിവാക്കാനാകുമെന്ന് അശ്ഗാൽ കരുതുന്നു. വെസ്റ്റ് ബേയിൽ എല്ലാ സേവനങ്ങളോടെയുമുള്ള രണ്ടു ബഹുനില പാർക്കിങ് കേന്ദ്രമാണ് ലക്ഷ്യമിടുന്നത്. ഇതിൽ 1,400 വാഹനങ്ങൾ ഉൾകൊള്ളാനാകുമെന്നാണ് കണക്കുകൂട്ടൽ.
സെൻട്രൽ ദോഹയിലും സമാനമായ രീതിയിൽ എല്ലാസൗകര്യങ്ങളോടും കൂടിയ എട്ട് ബഹുനില കെട്ടിടങ്ങളും പാർക്കിങ്ങിനായി ഒരുക്കും. 3,870 പാർക്കിങ് സ്ഥലങ്ങളാണ് ഇവിടെ ഉണ്ടാകുക. അതിനൂതനമായ പാർക്കിങ് സാങ്കേതികവിദ്യകളുടെ സഹായത്തോടെയാകും കേന്ദ്രങ്ങൾ സജ്ജമാക്കുക. വരുമാനം കണ്ടെത്താനായി ഇവിടെ മറ്റു സൗകര്യങ്ങളും ഒരുക്കാൻ അശ്ഗാൽ നിർമാണ കമ്പനിക്ക് അനുമതി നൽകിയിട്ടുണ്ട്.
