July 08, 2020
July 08, 2020
ദോഹ : ആഗസ്റ്റ് മുതൽ കേരളത്തിൽ നിന്നും ദോഹയിലേക്ക് വിമാനസർവീസുകൾ തുടങ്ങുമെന്ന് തെറ്റിദ്ധരിപ്പിക്കുന്ന തരത്തിൽ സമൂഹമാധ്യമങ്ങളിൽ അടിസ്ഥാനരഹിതമായ വാർത്തകൾ പ്രചരിക്കുന്നു. ചില വിമാനക്കമ്പനികൾ ഓൺലൈൻ ബുക്കിങ് തുടങ്ങിയതിന്റെ സ്ക്രീൻ ഷോട്ട് സഹിതമാണ് നാട്ടിൽ നിന്നുള്ള ഒരു ഓൺലൈൻ പോർട്ടൽ ഇത്തരമൊരു വാർത്ത നൽകിയത്.
അതേസമയം,ഇന്ത്യയിൽ നിന്ന് എപ്പോൾ മുതൽ ഗൾഫ് ഉൾപെടെയുള്ള വിദേശരാജ്യങ്ങളിലേക്ക് രാജ്യാന്തര സർവീസുകൾ തുടങ്ങുമെന്ന കാര്യത്തിൽ അന്തിമ തീരുമാനം വരുന്നത് വരെ ടിക്കറ്റുകൾ ബുക്ക് ചെയ്യരുതെന്ന് ഇന്ത്യൻ വ്യോമയാന മന്ത്രാലയം നേരത്തെ മുന്നറിയിപ്പ് നൽകിയിട്ടുണ്ട്.ഇത്തരത്തിൽ ബുക്ക് ചെയ്യുന്ന ടിക്കറ്റ് തുക തിരികെ ലഭിക്കില്ല.പകരം പിന്നീട് ഉപയോഗിക്കാനുള്ള അവസരം മാത്രമാണ് ലഭിക്കുക.
പല വിമാനക്കമ്പനികളും കേരളത്തിൽ നിന്നും ദോഹയിലേക്ക് ബുക്കിങ് സ്വീകരിച്ചുതുടങ്ങിയതിന്റെ അടിസ്ഥാനത്തിലുള്ള ചില മാധ്യമ വാർത്തകളിൽ വിശ്വസിച്ച് നേരത്തെയും നിരവധി പേർ കയ്യിലുള്ള പണം മുടക്കി ടിക്കറ്റ് ബുക്ക് ചെയ്തിരുന്നു.അതേസമയം,രാജ്യാന്തര സർവീസുകൾ തുടങ്ങണമെങ്കിൽ ഖത്തറിന്റെയും ഇന്ത്യൻ വ്യോമയാന മന്ത്രാലയത്തിന്റെയും അനുമതി ലഭിക്കേണ്ടതുണ്ട്. സെപ്തംബറിൽ ആരംഭിക്കുന്ന നാലാം ഘട്ട ഇളവുകൾക്ക് ശേഷം മാത്രമേ ഖത്തറിലേക്ക് രാജ്യാന്തര സർവീസുകൾക്ക് അനുമതി ലഭിക്കുകയുള്ളൂ എന്നിരിക്കെ,ഇതിനു ശേഷം മാത്രം കേരളത്തിൽ നിന്നും ദോഹയിലേക്ക് വിമാനടിക്കറ്റുകൾ ബുക്ക് ചെയ്യുന്നതാവും ഉചിതം.
കോവിഡ് വ്യാപനത്തിന് മുമ്പ് അവധിക്കു പോയി നാട്ടിൽ കുടുങ്ങിയ നിരവധി പേരാണ് ഖത്തറിലേക്ക് തിരിച്ചുവരാൻ അവസരം കാത്തുകഴിയുന്നത്.
ന്യൂസ്റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക