June 13, 2021
June 13, 2021
അൻവർ പാലേരി
ദോഹ : കോവിഡ് വ്യാപനത്തെ തുടർന്ന് ഖത്തറിലേക്ക് തിരിച്ചുവരുന്നവർക്കായി ഏർപ്പെടുത്തിയ ഹോട്ടൽ കൊറന്റൈൻ ഉടൻ അവസാനിച്ചേക്കുമോ എന്നത് സംബന്ധിച്ച ആശങ്കകളാണ് ഖത്തറിലെ പ്രവാസി മലയാളികൾ കഴിഞ്ഞ കുറെ ആഴ്ചകളായി തുടർച്ചയായി ഉന്നയിക്കുന്നത്. ഹോട്ടൽ കൊറന്റൈൻ വലിയ സാമ്പത്തിക ബാധ്യതകൾ ഉണ്ടാകുന്നതിനാൽ നിയന്ത്രണം നീക്കിയാൽ തിരിച്ചുവരാമെന്ന കണക്കുകൂട്ടലിൽ നിരവധി പേരാണ് നാട്ടിൽ കാത്തിരിക്കുന്നത്.ഇതിനു പുറമെ,ഖത്തറിൽ നിന്ന് നാട്ടിലേക്ക് പോകാനിരിക്കുന്നവരും തിരിച്ചു വരുമ്പോഴുള്ള അധിക സാമ്പത്തിക ബാധ്യതയോർത്ത് നിയന്ത്രണം നീക്കുന്നതുവരെ യാത്ര നീട്ടിവെക്കുകയാണ്.എന്നാൽ നിയന്ത്രണം നീക്കുന്നത് സംബന്ധിച്ച്‌ ഖത്തറിലെ ബന്ധപ്പെട്ട അധികൃതരുമായി ചർച്ചകൾ പുരോഗമിക്കുകയാണെന്നാണ് ഖത്തറിലെ ഇന്ത്യൻ അംബാസിഡർ ഡോ.ദീപക് മിത്തൽ കഴിഞ്ഞ ദിവസം അറിയിച്ചത്.
ഖത്തറിലെ ഇന്ത്യന്‍ അപെക്‌സ് ബോഡി സംഘടനകളുടെയും അഫിലിയേറ്റഡ് സംഘടനകളുടെയും പ്രതിനിധികളുടെ ഓണ്‍ലൈന്‍ യോഗത്തില്‍ സംസാരിക്കുന്നതിനിടെയാണ് വാക്‌സിനെടുത്ത ഇന്ത്യക്കാര്‍ക്ക് ക്വാറന്റീന്‍ ഒഴിവാക്കുന്ന കാര്യം ഖത്തര്‍ അധികൃതരുമായി ചര്‍ച്ച നടത്തിവരുന്നതായും അനുകൂല നടപടിയുണ്ടാകുമെന്ന് പ്രതീക്ഷിക്കുന്നതായും അംബാസിഡർ വ്യക്തമാക്കിയത്.
ഇന്ത്യയിലും ഖത്തറിലും കോവിഡിന്റെ രണ്ടാം തരംഗം വലിയ വെല്ലുവിളി ഉയര്‍ത്തിയ സാഹചര്യത്തിലാണ് ഖത്തര്‍ നിയന്ത്രണങ്ങള്‍ കൊണ്ട് വന്നത്. ഇപ്പോള്‍ ഇന്ത്യയിലെ കോവിഡ് സാഹചര്യത്തില്‍ മാറ്റം ഉണ്ടായിട്ടുണ്ട്. ഖത്തറും കോവിഡ് മുക്തിയുടെ പാതയിലാണ്. ഈ സാഹചര്യത്തില്‍ ഇന്ത്യക്കാര്‍ക്ക് ഇളവുകള്‍ ലഭിക്കുമെന്നാണ് പ്രതീക്ഷിക്കുന്നതെന്ന് അംബാസഡര്‍ പറഞ്ഞു.
നിലവിൽ ഇന്ത്യയിൽ കോവിഡ് വ്യാപനം കുറയുന്ന സാഹചര്യമാണ് ഉള്ളത്.ഈ അവസ്ഥ തുടർന്നാൽ അധികം വൈകാതെ തന്നെ ഇക്കാര്യത്തിൽ അനുകൂല തീരുമാനമുണ്ടാകുമെന്നാണ് പൊതുവെയുള്ള വിലയിരുത്തൽ.മെയ് ആദ്യവാരം ഇന്ത്യയിൽ പ്രതിദിന കോവിഡ് കണക്കുകൾ നാല് ലക്ഷത്തിന് മുകളിൽ ആയിരുന്നത് ജൂൺ ഒന്നിന് 132,788 ആയി കുറഞ്ഞിട്ടുണ്ട്. ജൂൺ 12 ന് 80,834 പേർക്ക് മാത്രമാണ് പുതുതായി കോവിഡ് സ്ഥിരീകരിച്ചത്.
