March 25, 2022
March 25, 2022
ദോഹ : ഖത്തർ ഫുട്ബോൾ ലോകകപ്പ് വീക്ഷിക്കാനെത്തുന്ന കാണികൾക്ക്, ഖത്തറിലുള്ള സുഹൃത്തുക്കളുടെയും ബന്ധുക്കളുടെയും കൂടെ താമസിക്കാം. ഹോട്ടലുകൾ, അപ്പാർട്ട്മെന്റുകൾ, ഫാൻ വില്ലേജുകൾ തുടങ്ങിയ സൗകര്യങ്ങൾ കൂടാതെയാണ് ഈ താമസസൗകര്യം. ഹയ്യാ പോർട്ടലിലൂടെയാണ് അധികൃതർ ഇത് സംബന്ധിച്ച വിവരങ്ങൾ വിശദീകരിച്ചത്.
ഖത്തറിലുള്ള ഒരു വ്യക്തിക്ക്, പത്ത് സന്ദർശകർക്ക് വരെ താമസം ഒരുക്കാനാവും. അതിന് മുൻപായി, സന്ദർശകർ ഹയ്യാ പോർട്ടലിലൂടെ താമസവുമായി ബന്ധപ്പെട്ട വിവരങ്ങൾ രേഖപ്പെടുത്തണം. ഖത്തർ അക്കമെഡേഷൻ ഏജൻസി, ഹോളിഡേ വെബ്സൈറ്റുകൾ, ഹോട്ടലുകൾ തുടങ്ങിയവ വഴിയും താമസസൗകര്യം ബുക്ക് ചെയ്യാം. ടിക്കറ്റുകൾ വാങ്ങിയ വ്യക്തികൾ നിർബന്ധമായും ഹയ്യാ കാർഡിന് അപേക്ഷിക്കണമെന്നും അധികൃതർ ഓർമിപ്പിച്ചു. ലോകകപ്പ് കാലയളവിൽ ഖത്തറിൽ കളി കാണാനെത്തുന്ന വിദേശികൾക്ക് രാജ്യത്തേക്ക് പ്രവേശിക്കാനും ടിക്കറ്റുള്ളവർക്ക് സ്റ്റേഡിയത്തിലേക്ക് പ്രവേശിക്കാനും ഹയ്യാ കാർഡ് നിർബന്ധമാണ്.