December 05, 2022
December 05, 2022
അൻവർ പാലേരി
ദോഹ : ഡിസംബർ 5 അന്തർദേശീയ വോളണ്ടിയർ ദിനമായി ആചരിക്കുമ്പോൾ ഖത്തറിലെ മലയാളികളെ ഇത്തവണ കാത്തിരിക്കുന്നത് അഭിമാന നിമിഷങ്ങൾ.ലോകകപ്പ് വേദികളിലും മറ്റുമായി സജീവമായി പ്രവർത്തിക്കുന്ന നൂറുകണക്കിന് മലയാളികൾ ഉൾപെടെയുള്ള വോളണ്ടിയർമാർക്ക് ഇത്തവണത്തെ ദേശീയദിന പരേഡിൽ പങ്കെടുക്കാൻ അവസരം ലഭിക്കും.നിരവധിപേർക്ക് ഇതിനോടകം തന്നെ ഇതിനുള്ള ഔദ്യോഗിക ക്ഷണം ലഭിച്ചു കഴിഞ്ഞു.
ഖത്തർ ലോകകപ്പിന്റെ വിജയകരമായ നടത്തിപ്പിൽ പങ്കാളികളായി നൂറു കണക്കിന് മലയാളികളാണ് കഴിഞ്ഞ രണ്ടാഴ്ചയിലേറെയായി വിവിധ മേഖലകളിൽ പ്രവർത്തിക്കുന്നത്.മറ്റു രാജ്യങ്ങളിൽ നിന്നുള്ള വോളണ്ടിയാർമരിൽ നിന്ന് വ്യത്യസ്തമായി ഫുട്‍ബോളിനെയും വളർത്തുരാജ്യമായ ഖത്തറിനെയും ഒരു പോലെ നെഞ്ചേറ്റുന്ന മലയാളികളുടെ സ്തുത്യർഹമായ സേവനം ഇതിനോടകം തന്നെ ലോകകപ്പ് സംഘാടകരുടെ പ്രശംസ പിടിച്ചുപറ്റിയിട്ടുണ്ട്.ഫിഫ അധ്യക്ഷൻ ജിയാനി ഇൻഫാന്റിനോ മുതൽ പ്രമുഖ കളിക്കാരുടെ അസിസ്റ്റിങ് വിഭാഗങ്ങളിൽ വരെ മലയാളികളുടെ സാന്നിധ്യമുണ്ട്.
മലയാളികൾ ഉൾപ്പെടെയുള്ള ഇന്ത്യക്കാരും മറ്റു വിദേശികളും രാജ്യത്തിന്റെ അഭിമാനമായി മാറിയ വിശ്വമേളയിൽ നൽകിയ സംഭാവനകൾ പരിഗണിച്ചാണ് ഡിസംബർ 18 ന് നടക്കുന്ന ദേശീയ ദിന പരേഡിൽ അവരെയും പങ്കെടുപ്പിക്കുന്നത്.കോവിഡ് മഹാമാരിയിൽ രാജ്യത്തിനൊപ്പം നിന്ന് പ്രതിരോധ പ്രവർത്തനങ്ങളിൽ പങ്കാളികളായ നൂറു കണക്കിന് മലയാളികൾ ഉൾപ്പെടെയുള്ള ആരോഗ്യപ്രവർത്തകരെ കഴിഞ്ഞ വർഷത്തെ ദേശീയദിന പരേഡിൽ പങ്കെടുപ്പിച്ചിരുന്നു.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/C2rupFykVgXBqmlpJc6amX എന്ന ലിങ്കിൽ ജോയിൻ ചെയ്യുക
