November 16, 2021
November 16, 2021
ദോഹ : കോവിഡിനെതിരെയുള്ള കരുതൽ കൂടുതൽ ഫലപ്രദമാക്കാൻ കുട്ടികൾക്കും വാക്സിൻ നൽകാനുള്ള ഒരുക്കത്തിലാണ് ഖത്തർ. അഞ്ചുമുതൽ പതിനൊന്ന് വയസ്സുവരെ പ്രായമുള്ള കുട്ടികൾക്ക് നൽകാനുള്ള ഫൈസർ വാക്സിൻ ജനുവരിയിൽ രാജ്യത്തെത്തുമെന്ന് ആരോഗ്യമന്ത്രാലയപ്രതിനിധി അറിയിച്ചു. ഖത്തർ ടീവിയിലെ പ്രത്യേകപരിപാടിയിൽ സംസാരിക്കവെയാണ് ഡോക്ടർ മുഹമ്മദ് അൽ ജനാഹി ഇതേപ്പറ്റി പരാമർശിച്ചത്. 1440 കുട്ടികളിൽ രണ്ട് മാസത്തോളം നീണ്ടുനിന്ന പഠനങ്ങൾ നടത്തിയ ശേഷമാണ് കുട്ടികൾക്കും വാക്സിൻ നൽകാൻ ഖത്തർ തീരുമാനിച്ചത്.
ഓരോ രക്ഷിതാക്കളും തങ്ങളുടെ കുട്ടികൾക്ക് വാക്സിനേകാൻ മുന്നോട്ട് വരണമെന്ന നിർദ്ദേശവും ജഹാനി മുന്നോട്ടുവെച്ചു. കൊറോണ വ്യാപനത്തിന് കുട്ടികളും വാഹകരായി പ്രവർത്തിക്കുന്നുണ്ടെന്നാണ് പഠനങ്ങൾ പറയുന്നത്. അതിനാൽ, വാക്സിനേഷൻ പ്രക്രിയയെ നിസാരമായി കാണരുത് - ജഹാനി കൂട്ടിച്ചേർത്തു. മുതിർന്നവർക്കുള്ള വാക്സിന്റെ മൂന്നിലൊന്ന് അളവിലാണ് കുട്ടികൾക്ക് വാക്സിൻ നൽകുന്നതെന്നും ഡോക്ടർ അറിയിച്ചു.