December 03, 2019
December 03, 2019
ദോഹ : തൊഴിലാളികളുടെ ജീവിത സാഹചര്യങ്ങൾ മെച്ചപ്പെടുത്തുന്നതിന് ഖത്തർ നടപ്പിലാക്കിയ പരിഷ്കരണങ്ങൾ യു.എൻ പ്രത്യേക റാപ്പോർട്ടർ പ്രശംസിച്ചു. വംശീയ വിവേചനം,വർഗീയത,അസഹിഷ്ണുത,സെനോഫോബിയ എന്നിവയുടെ ആധുനിക വകഭേദങ്ങൾ കൈകാര്യം ചെയ്യുന്ന യു.എൻ റാപ്പോർട്ടർ ടെൻഡയിൽ ആച്ചിയമാണ് ഈ മേഖലയിൽ ഖത്തർ നടപ്പാക്കിയ പരിഷ്കരണങ്ങളെ അഭിനന്ദിച്ചത്. 2022 ന്റെ തുടക്കത്തിൽ രാജ്യം നടപ്പാക്കാനിരിക്കുന്ന അധിക പരിഷ്കാരങ്ങളെ കുറിച്ചും അവർ വിശദീകരിച്ചു. നവംബർ 23 മുതൽ ഡിസംബർ ഒന്നുവരെ നടത്തിയ ഖത്തർ സന്ദർശനത്തിന്റെ സമാപനത്തോടനുബന്ധിച്ച് നടത്തിയ വാർത്താ സമ്മേളനത്തിലാണ് അവർ ഇക്കാര്യങ്ങൾ പറഞ്ഞത്.
സർക്കാർ ഉദ്യോഗസ്ഥർ,അക്കാദമിക്,വംശീയ,മത ന്യുനപക്ഷ പ്രതിനിധികൾ എന്നിവരുമായി ആച്ചിയം കൂടിക്കാഴ്ച നടത്തിയിരുന്നു. വംശീയതയെ ചെറുക്കാനുള്ള ഖത്തറിന്റെ പ്രതിജ്ഞാബദ്ധതയെ ആച്ചിയം അഭിനന്ദിച്ചു. രാജ്യം . സന്ദർശിക്കാനും കുറഞ്ഞവരുമാനക്കാരായ വിദേശ തൊഴിലാളികളെ നേരിൽ കാണാനും ക്ഷണിച്ച ഖത്തറിനോട് നന്ദിയുണ്ട്. എല്ലാ സ്ഥലങ്ങളിലും സ്വതന്ത്രമായി സഞ്ചരിക്കാനും തൊഴിലാളികളെ നേരിൽ കാണാനും അവസരമൊരുക്കിയ സർക്കാർ ഇക്കാര്യത്തിലുള്ള അവരുടെ പ്രതിജ്ഞാബദ്ധതയാണ് തെളിയിച്ചതെന്നും അവർ കൂട്ടിച്ചേർത്തു.
