October 10, 2021
October 10, 2021
ദോഹ: ഖത്തറിലെ അൽ മറൂന ബീച്ചിൽ കുളിക്കാനിറങ്ങിയ മൂന്ന് ഇന്ത്യക്കാർ മുങ്ങി മരിച്ചു. തമിഴ്നാട് സ്വദേശികളായ അച്ഛനും മകനും, തമിഴ്നാടുകാരിയായ മറ്റൊരു പെൺകുട്ടിയുമാണ് മരണമടഞ്ഞത്. വെള്ളിയാഴ്ച വൈകീട്ട് അഞ്ചുമണിക്കായിരുന്നു സംഭവം.
ദോഹയിലെ കിയോ ഇന്റർനാഷണൽ കൺസൾട്ടന്റിൽ ജോലി ചെയ്യുന്ന ബാലാജി (38), ഇദ്ദേഹത്തിന്റെ മകനായ ബിർള പബ്ലിക് സ്കൂളിലെ അഞ്ചാംതരം വിദ്യാർത്ഥി രക്ഷൻ (10),മൊണാർക്ക് സ്കൂളിലെ ഏഴാം ക്ലാസ് വിദ്യാർത്ഥിനി വർഷിനി (12) എന്നിവർക്കാണ് ജീവൻ നഷ്ടമായത്. ബാലാജി തഞ്ചാവൂർ സ്വദേശിയും, വർഷിനി ചെന്നൈ സ്വദേശിനിയുമാണ്. ആഴമില്ലാത്ത സ്ഥലത്ത് കുളിച്ചുകൊണ്ടിരിക്കവേ വലിയൊരു തിര പ്രത്യക്ഷപ്പെട്ടതാണ് അപകടകാരണമായതെന്ന് കൂടെയുണ്ടായിരുന്ന ബന്ധുക്കൾ പറഞ്ഞു. ബാലാജിയും വർഷിനിയും സംഭവസ്ഥലത്ത് തന്നെ മരണമടഞ്ഞു. കോസ്റ്റ് ഗാർഡും പോലീസും ചേർന്ന് രക്ഷിച്ച ബാലാജിയുടെ മകൻ സിദ്ര ഹോസ്പിറ്റലിൽ വെച്ചാണ് മരണപ്പെട്ടത്. മൃതദേഹങ്ങൾ നടപടികൾ പൂർത്തിയാക്കിയ ശേഷം നാട്ടിലേക്ക് കൊണ്ടുപോവും.