January 21, 2022
January 21, 2022
ദോഹ : ഈ വർഷമവസാനം ഖത്തർ വേദിയാവുന്ന ലോകകപ്പ് ഫുട്ബോളിന്റെ ടിക്കറ്റ് വില്പനയ്ക്ക് മികച്ച പ്രതികരണം. ഫിഫയുടെ ഔദ്യോഗിക വെബ്സൈറ്റിൽ രണ്ട് ദിവസത്തിനകം ലക്ഷക്കണക്കിന് ആളുകളാണ് ടിക്കറ്റിനായി എത്തിയത്. ആദ്യ 24 മണിക്കൂറിനുള്ളിൽ 1.2 മില്യൺ ആളുകൾ ടിക്കറ്റിന് അപേക്ഷിച്ചതായി ഫിഫ അറിയിച്ചു.
ആദ്യം രജിസ്റ്റർ ചെയ്യുന്ന ആളുകൾക്ക് മുൻഗണന ഉണ്ടാവില്ലെന്നും, ലഭ്യമായ ടിക്കറ്റുകളെക്കാൾ അപേക്ഷകർ ഉണ്ടെങ്കിൽ, അപേക്ഷകരിൽ നിന്നും പ്രത്യേക നറുക്കെടുപ്പിലൂടെ ടിക്കറ്റിന് അർഹരായവരെ കണ്ടെത്തുമെന്നും ഫിഫ അറിയിച്ചിരുന്നു. ആതിഥേയരായ ഖത്തറിൽ നിന്നാണ് ഏറ്റവും അധികം ആളുകൾ ടിക്കറ്റിന് അപേക്ഷിച്ചത്. രണ്ടാം സ്ഥാനത്തുള്ളത് ലാറ്റിനമേരിക്കൻ രാജ്യമായ അർജന്റീനയാണ്. മെക്സിക്കോ, അമേരിക്ക, യുഎഇ, ഇംഗ്ലണ്ട്, ഇന്ത്യ, സൗദി ബ്രസീൽ, ഫ്രാൻസ് തുടങ്ങിയ രാജ്യങ്ങളിൽ നിന്നും നിരവധി പേർ ടിക്കറ്റിനായി അപേക്ഷിച്ചിട്ടുണ്ട്. ഉദ്ഘാടന മത്സരം കാണാൻ എൺപതിനായിരം ആളുകൾ ഇതുവരെ ടിക്കറ്റിന് ബുക്ക് ചെയ്തപ്പോൾ, കലാശപ്പോരാട്ടം വീക്ഷിക്കാൻ 1,40,000 ആളുകൾ ഇതിനോടകം അപേക്ഷ സമർപ്പിച്ചു കഴിഞ്ഞു. ടിക്കറ്റുകൾ സ്വന്തമാക്കിയവരെ മാർച്ച് എട്ടിന് മെയിലിലൂടെ വിവരമറിയിക്കുമെന്നും, തുടർന്നാണ് പണം അടയ്ക്കേണ്ടതെന്നും ഫിഫ വ്യക്തമാക്കി. ടിക്കറ്റുകൾ ബുക്ക് ചെയ്യാനും, മറ്റ് വിവരങ്ങൾക്കും http://FIFA.com/tickets സന്ദർശിക്കുക.