February 10, 2022
February 10, 2022
ദോഹ : രാജ്യത്തിന്റെ വിവിധ ഭാഗങ്ങളിൽ ശനിയാഴ്ച്ച മുതൽ അന്തരീക്ഷ താപനില നിലവിലുള്ളതിലും കുറയുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. വടക്കുപടിഞ്ഞാറൻ കാറ്റ് ശക്തിയാർജിക്കുന്നതിനാൽ തിങ്കളാഴ്ച്ച വരെ താപനിലയിൽ കുറവുണ്ടായേക്കും. അബുസംറയിൽ താപനില കേവലം അഞ്ച് ഡിഗ്രി സെൽഷ്യസിലേക്ക് കൂപ്പുകുത്തിയതായും അധികൃതർ അറിയിച്ചു. ഈ ശൈത്യകാലത്ത് അബുസംറ പ്രദേശത്താണ് ഏറ്റവുമധികം തണുപ്പ് അനുഭവപ്പെട്ടത്.
ശനിയാഴ്ച്ച മുതൽ മണിക്കൂറിൽ ശരാശരി 12 മുതൽ 22 കിലോമീറ്റർ വരെ വേഗത്തിൽ വടക്കുപടിഞ്ഞാറൻ കാറ്റുവീശും. ചില ഇടങ്ങളിൽ 30 കിലോമീറ്റർ വരെ വേഗത കൈവരിക്കുമെന്നും, ദൃശ്യപരത രണ്ട് കിലോമീറ്റർ ദൂരപരിധിയിലേക്ക് കുറയാൻ സാധ്യത ഉണ്ടെന്നും അധികൃതർ മുന്നറിയിപ്പ് നൽകിയിട്ടുണ്ട്. ശനിയാഴ്ച്ച മുതൽ തിങ്കളാഴ്ച്ച വരെ കടലുമായി ബന്ധപ്പെട്ടുള്ള പ്രവർത്തനങ്ങളിൽ ഏർപ്പെടുന്നവർ ജാഗ്രത പാലിക്കണമെന്നും നിർദ്ദേശമുണ്ട്.
