November 23, 2021
November 23, 2021
ദോഹ : പരീക്ഷയുടെ സമ്മർദ്ദം അകറ്റാൻ വിദ്യാർത്ഥികൾക്ക് ഗുളികകൾ നൽകിയ അധ്യാപികയെ സർവീസിൽ നിന്നും പിരിച്ചുവിട്ടതായി വിദ്യാഭ്യാസ മന്ത്രാലയം. കഴിഞ്ഞ ആഴ്ചയാണ് സ്വകാര്യ സ്കൂളിലെ നാല് വിദ്യാർത്ഥികൾക്ക് അധ്യാപിക ഗുളികകൾ നൽകിയത്. സംഭവം ശ്രദ്ധയിൽ പെട്ട രക്ഷിതാക്കൾ പരാതിയുമായി രംഗത്തെത്തിയതിന് പിന്നാലെ വിദ്യാഭ്യാസ മന്ത്രാലയം അന്വേഷണം പ്രഖ്യാപിച്ചിരുന്നു. പിന്നാലെയാണ് നടപടി.
തീർത്തും ഒറ്റപ്പെട്ട സംഭവമാണ് നടന്നതെന്നും, ഇത്തരം നടപടികൾ ഇനി ആവർത്തിക്കാതിരിക്കാൻ വേണ്ട നടപടികൾ സ്വീകരിക്കുമെന്നും മന്ത്രാലയം രക്ഷിതാക്കൾക്ക് ഉറപ്പുനൽകി. കുറ്റാരോപിതയായ അധ്യാപികയെയും, സ്കൂൾ അധികൃതരെയും, ഗുളിക കഴിച്ച വിദ്യാർത്ഥികളെയും നേരിൽ കണ്ട് അന്വേഷണം നടത്തിയ ശേഷമാണ് അധികൃതർ നടപടി എടുത്തത്. പരിശോധനയ്ക്കായി ലാബിലേക്ക് അയച്ച ഗുളികകളിൽ നിരോധിത പദാർത്ഥങ്ങൾ ഒന്നും അടങ്ങിയിട്ടില്ലെന്നും അധികൃതർ വ്യക്തമാക്കി. സമാനമായ എന്തെങ്കിലും പരാതികളോ മറ്റോ ശ്രദ്ധയിൽ പെട്ടാൽ 155 എന്ന ടോൾ ഫ്രീ നമ്പറിൽ അധികൃതരെ ബന്ധപ്പെടാനും വിദ്യാഭ്യാസമന്ത്രാലയം നിർദേശം നൽകി.