November 10, 2021
November 10, 2021
നേപ്പാൾ : പർവ്വതാരോഹണ രംഗത്ത് വിസ്മയം സൃഷ്ടിച്ച് മുന്നേറുന്ന ഷെയ്ഖ അസ്മയുടെ കിരീടത്തിലേക്ക് മറ്റൊരു പൊൻതൂവൽ കൂടി. 6,812 മീറ്റർ ഉയരമുള്ള അമ ദബ്ലം കൊടുമുടി കീഴടക്കിയ വാർത്ത ഇൻസ്റ്റഗ്രാം പോസ്റ്റിലൂടെയാണ് അസ്മ പങ്കുവെച്ചത്. ഹിമാലയ മലനിരകളിൽപെടുന്ന അമ, ഏറ്റവും ദുർഘടമായ പർവ്വതങ്ങളിൽ ഒന്നായാണ് വിലയിരുത്തപ്പെടുന്നത്. 'കീഴടക്കാൻ കഴിയാത്തത്' എന്നായിരുന്നു ഈ പർവ്വതത്തിന് എഡ്മണ്ട് ഹിലാരി നൽകിയ വിശേഷണം.
അമ ദബ്ലം കൊടുമുടി കീഴടക്കുന്ന ആദ്യ ഖത്തറി വനിതയെന്ന ബഹുമതിയും ഇതോടെ അസ്മ സ്വന്തമാക്കി. 2021 ൽ താരം കീഴടക്കുന്ന നാലാമത്തെ പർവതമാണ് അമ ദബ്ലം. നേപ്പാളിൽ തന്നെ സ്ഥിതിചെയ്യുന്ന, ലോകത്തിലെ ഏറ്റവും വലിയ ഏഴാമത്തെ കൊടുമുടിയായ ദൗലാഗിരിയും അസ്മ ഈ വർഷം കീഴടക്കിയിരുന്നു. ഓക്സിജൻ ശ്വസനസഹായി ഇല്ലാതെ മൗണ്ട് മനാസ്ലു കീഴടക്കിയും അസ്മ വാർത്തകളിൽ ഇടംപിടിച്ചിരുന്നു. കൂട്ടായ പരിശ്രമത്തിന്റെ ഫലമായാണ് അമ ദബ്ലം കീഴടക്കാൻ സാധിച്ചതെന്നാണ് അസ്മ ഇൻസ്റ്റഗ്രാമിൽ കുറിച്ചത്.