December 27, 2021
December 27, 2021
ദോഹ : കാല്പന്തിന്റെ വിശ്വമാമാങ്കത്തിന് അടുത്ത വർഷം വേദിയാവുന്ന ഖത്തറിൽ, ടൂർണമെന്റിനോട് അനുബന്ധിച്ച് വാടകയിൽ വൻ വർദ്ധനവ് ഉണ്ടാവുമെന്ന് റിപ്പോർട്ട്. ദോഹ ന്യൂസ്നൽകിയ റിപ്പോർട്ട് പ്രകാരം, താമസിക്കാൻ ഉതകുന്ന കെട്ടിടങ്ങളുടെ വാടകയിൽ ആണ് വ്യതിയാനം ഉണ്ടാവുക. ഒരു മില്യനോളം ആളുകൾ ലോകകപ്പ് വീക്ഷിക്കാനായി ഖത്തറിൽ എത്തുമെന്നാണ് കണക്കാക്കപ്പെടുന്നത്.
ഖത്തർ കേന്ദ്രമാക്കി പ്രവർത്തിക്കുന്ന റിയൽ എസ്റ്റേറ്റ് ഗ്രൂപ്പായ അൽ അസ്മാഖ് ആണ് ഈ റിപ്പോർട്ട് തയ്യാറാക്കിയത്. ലുസൈലിൽ അടക്കം നിരവധി പുതിയ പ്രോജക്ടുകൾ അന്തിമഘട്ടത്തിൽ ആണെന്നും റിപ്പോർട്ടിൽ പറയുന്നു. അടിസ്ഥാനസൗകര്യങ്ങൾക്കായി 20 ബില്യൺ ഡോളറോളം തുകയാണ് കഴിഞ്ഞ ബജറ്റിൽ മാറ്റിവെച്ചത്. ഇതുപയോഗിച്ചാണ് ലോകകപ്പ് മുന്നൊരുക്കങ്ങൾ മുന്നേറുന്നത്. സുപ്രീം കമ്മറ്റിയുടെ മേൽനോട്ടത്തിൽ വിവിധ കെട്ടിടസമുച്ചയങ്ങൾ നിർമ്മിക്കുകയും പതിനയ്യായിരത്തോളം റൂമുകൾ തയ്യാറാക്കുകയും ചെയ്തിട്ടുണ്ട്. ഇതിന്റെ വാടക നിശ്ചയിച്ച ശേഷം, അഞ്ചുവർഷത്തെ കരാർ അടിസ്ഥാനത്തിൽ ഇവ കൈമാറ്റം ചെയ്യപ്പെടും. 2022 ന്റെ ആദ്യപകുതിയോടെ സിംഗിൾ ബെഡ്‌റൂം, ഡബിൾ ബെഡ്‌റൂം ഫ്‌ളാറ്റുകളുടെ ആവശ്യക്കാരുടെ എണ്ണത്തിൽ വർദ്ധനവ് ഉണ്ടാവുമെന്നും, ഇതിന് ആനുപാതികമായി വാടകയും വർധിക്കുമെന്നും റിപ്പോർട്ട് പറയുന്നു.
