November 29, 2021
November 29, 2021
ദോഹ : വരുന്ന വർഷം നടക്കാനിരിക്കുന്ന ഫുട്ബോൾ ലോകകപ്പിന്റെ പ്രധാനമുന്നൊരുക്കങ്ങളിൽ ഒന്നായ കൺട്രോൾ റൂം പൂർണസജ്ജമായി. ആസ്പയർ സ്പോർട്സ് ആക്സിലറേറ്റർ കോംപ്ലക്സിലാണ് കമന്റ് ആൻഡ് കൺട്രോൾ സെന്റർ പ്രവർത്തിക്കുക. ലോകകപ്പുമായി ബന്ധപ്പെട്ട എല്ലാ വിവരസാങ്കേതിക ജോലികളും ഈ സെന്ററിലാണ് അരങ്ങേറുക.
നാളെ ആരംഭിക്കുന്ന ഫിഫ അറബ് കപ്പിന്റെ സാങ്കേതികകാര്യങ്ങളും ഇതേ കമാന്റ് സെന്ററിൽ വെച്ച് നിയന്ത്രിക്കും. അറബ് കപ്പുമായി ബന്ധപ്പെട്ട കാര്യങ്ങൾ നിയന്ത്രിക്കുന്നതിലൂടെ ഏതെങ്കിലും മേഖലകളിൽ മാറ്റങ്ങൾ വരുത്തേണ്ടതുണ്ടോ എന്ന് കണ്ടെത്താൻ കഴിയുമെന്നാണ് അധികൃതരുടെ കണക്കുകൂട്ടൽ. എല്ലാ സ്റ്റേഡിയങ്ങളിലെ വിവരങ്ങളിലും കമാന്റ് സെന്ററിൽ ഇരുന്ന് തത്സമയം അറിയാൻ സാധിക്കുമെന്നും, ലോകത്ത് തന്നെ ആദ്യമായാണ് ഒരു ആതിഥേയരാജ്യം ഇത്തരമൊരു കമാന്റ് സെന്ററിലൂടെ ലോകകപ്പ് നിയന്ത്രിക്കുന്നതെന്നും അധികൃതർ അവകാശപ്പെട്ടു. എട്ട് ലോകകപ്പ് സ്റ്റേഡിയങ്ങളുമായും ബന്ധപ്പെടുത്തിയിട്ടുള്ള ഈ സെന്ററിലെ സീസീടീവികൾ വഴി സ്റ്റേഡിയങ്ങളിലെ പ്രവേശനകവാടങ്ങൾ വീക്ഷിക്കാനും, കളി കാണാനെത്തുന്ന ആരാധകരുടെ എണ്ണമെടുക്കാനും കഴിയും.