April 05, 2022
April 05, 2022
ദോഹ : നവംബറിൽ ഫുട്ബോൾ ലോകകപ്പ് ആരംഭിക്കുന്നതോടെ, രാജ്യത്തേക്ക് പ്രവേശിക്കുന്ന ആളുകളുടെ എണ്ണം നിയന്ത്രിക്കുമെന്ന് ഖത്തർ ടൂറിസം വക്താവ് അറിയിച്ചു. ലോകകപ്പിനെത്തുന്ന കാണികൾക്കായി ഒരുക്കുന്ന താമസസൗകര്യങ്ങൾ അർഹർക്ക് ലഭ്യമാവുന്നുണ്ട് എന്നുറപ്പാക്കാനാണ് നടപടി. 2022 നവംബർ ഒന്ന് മുതൽ, 2023 ജനുവരി 23 വരെയാണ് നിയന്ത്രണങ്ങൾ. അതേസമയം, നിലവിൽ ഖത്തറിലെ താമസവിസ കൈവശമുള്ളവർക്ക് ഈ നിയമം ബാധകമാവില്ലെന്നാണ് സൂചനകൾ.
ഈ കാലയളവിൽ, ലോകകപ്പ് ടിക്കറ്റും ഹയ്യാ കാർഡ് എന്ന ഫാൻ കാർഡും കൈവശമുള്ള ആളുകൾക്ക് മാത്രമാണ് വിസ അനുവദിക്കുക. മത്സരങ്ങൾ ഉള്ള ദിവസങ്ങളിലെ സൗജന്യ പൊതുഗതാഗതം അടക്കമുള്ള സേവനങ്ങൾക്കും ഹയ്യാ കാർഡ് നിർബന്ധമാണ്. കഴിഞ്ഞ വർഷം ഇംഗ്ലണ്ടിലെ വെംബ്ലി സ്റ്റേഡിയത്തിൽ നടന്ന യൂറോ കപ്പ് ഫൈനലിന് ടിക്കറ്റില്ലാത്ത കാണികൾ സംഘടിച്ച് സംഘർഷാവസ്ഥ സൃഷ്ടിച്ചിരുന്നു. ഇത്തരം സാഹചര്യങ്ങൾ ഒഴിവാക്കാനാണ് അധികൃതർ ഇത്തരമൊരു നിയമം നടപ്പിലാക്കുന്നത്.