April 11, 2022
April 11, 2022
ദോഹ : ഖത്തറിൽ ഏപ്രിൽ 15 വെള്ളിയാഴ്ച ദേശീയ കുടുംബദിനമായി ആചരിക്കും. എല്ലാ വർഷവും ഇതേ ദിവസം നടക്കാറുള്ള പ്രത്യേക പരിപാടികൾ ഈ വർഷവും മാറ്റമില്ലാതെ തുടരുമെന്ന് ഖത്തർ സാമൂഹികക്ഷേമവകുപ്പ് അറിയിച്ചു. സമൂഹത്തിൽ കുടുംബവ്യവസ്ഥയ്ക്കുള്ള പ്രാധാന്യത്തെ പറ്റിയുള്ള ബോധവൽക്കരണപരിപാടികൾ ഈ ദിവസം അരങ്ങേറും. "കുടുംബങ്ങളുടെ യോജിപ്പ്, ഖത്തറിന്റെ കരുത്ത്" എന്നതാണ് ഈ വർഷത്തെ കുടുബദിന സന്ദേശം.
ഓരോ സമൂഹത്തിന്റെയും നട്ടെല്ലാണ് കുടുംബങ്ങളെന്നും, കുടുംബദിനം ആചരിക്കാനായി ഒരുദിവസം തിരഞ്ഞെടുത്ത ഖത്തർ മറ്റ് രാജ്യങ്ങൾക്ക് മാതൃകയാണെന്നും സാമൂഹ്യക്ഷേമവകുപ്പ് മന്ത്രി മറിയം ബിൻത് അലി ബിൻ നാസർ അൽ മിസ്നദ് അഭിപ്രായപ്പെട്ടു. കുടുംബങ്ങളുടെ കെട്ടുറപ്പും, അതുവഴി നേടുന്ന സാമൂഹ്യപുരോഗതിയും ഖത്തർ ദേശീയ വിഷൻ 2030 ന്റെ അവിഭാജ്യ ഘടകങ്ങളിൽ ഒന്നാണെന്നും മന്ത്രി കൂട്ടിച്ചേർത്തു. കുടുംബദിനത്തോട് അനുബന്ധിച്ച് മന്ത്രാലയത്തിന്റെ കെട്ടിടങ്ങൾ ഏപ്രിൽ 15 ന് പച്ചനിറം അണിയുമെന്നും മന്ത്രി അറിയിച്ചു.