November 10, 2019
November 10, 2019
ദോഹ : ദോഹയിൽ ഉൾപെടെ രാജ്യത്തിന്റെ വിവിധ ഭാഗങ്ങളിൽ ഇന്നുച്ചയോടെ ശക്തമായ മഴ ലഭിച്ചു. ദോഹ,ഹിലാൽ,തുമാമ,മദീന ഖലീഫ,ബിൻ മഹമൂദ്,അബൂഹമൂർ,മുഐതർ തുടങ്ങിയ സ്ഥലങ്ങളിലെല്ലാം തുടർച്ചയായി അരമണിക്കൂറോളം മഴ ലഭിച്ചു. പലയിടങ്ങളിലും ശക്തമായ ആലിപ്പഴ വർഷത്തോടെയാണ് മഴ പെയ്തത്.
ദോഹയുടെ താഴ്ന്ന പ്രദേശങ്ങളിലെല്ലാം ചെറിയ രീതിയിൽ വെള്ളക്കെട്ട് രൂപപ്പെട്ടിട്ടുണ്ട്. ഈ സ്ഥലങ്ങളിൽ വെള്ളം നീക്കം ചെയ്യാനുള്ള ശ്രമങ്ങൾ തുടരുകയാണ്.
മഴയ്ക്ക് മുന്നോടിയായി രാജ്യത്തിന്റെ പല ഭാഗങ്ങളിലും ശക്തമായ പൊടിക്കാറ്റ് അനുഭവപ്പെട്ടിരുന്നു. നിർമാണ പ്രവർത്തനങ്ങൾ നടക്കുന്ന പ്രദേശങ്ങളിൽ മണൽ റോഡുകളിലേക്ക് ഇരച്ചു കയറിയത് അൽപ നേരത്തേക്ക് ഗതാഗതം ദുസ്സഹമാക്കി.
രാജ്യത്തിന്റെ പല മേഖലകളിലും ആകാശം മേഘാവൃതമാണ്. ഈ വാരാന്ത്യം മുഴുവൻ രാജ്യത്ത് അസ്ഥിര കാലാവസ്ഥ അനുഭവപ്പെടുമെന്ന് കാലാവസ്ഥാ കേന്ദ്രം ദിവസം മുന്നറിയിപ്പ് നൽകിയിരുന്നു.
