September 04, 2021
September 04, 2021
ലോകകപ്പിനുള്ള മുന്നൊരുക്കങ്ങളുടെ ഭാഗമായി ആതിഥേയരായ ഖത്തർ ഇന്ന് കരുത്തരായ പോർച്ചുഗലിനെ നേരിട്ടും. ഹംഗറിയിലെ നാഗ്യർദേയി സ്റ്റേഡിയത്തിൽ ഇന്ത്യൻ സമയം രാത്രി 10:15 നാണ് മത്സരം.
അവസാന യോഗ്യതാമത്സരത്തിൽ അയർലണ്ടിനെതിരെ അവസാനമിനിറ്റുകളിൽ ഇരട്ടഗോൾ നേടിയ സൂപ്പർ താരം ക്രിസ്ത്യാനോ റൊണാൾഡോ പോർച്ചുഗൽ നിരയിൽ ഇറങ്ങില്ല. ഈ ട്രാൻസ്ഫർ ജാലകത്തിൽ മാഞ്ചസ്റ്റർ യുണൈറ്റഡിലേക്ക് ചേക്കേറിയ താരം മുന്നൊരുക്കങ്ങളുടെ ഭാഗമായി ഇംഗ്ലണ്ടിലേക്ക് മടങ്ങി. റൊണാൾഡോയുടെ അഭാവത്തിൽ ആന്ദ്രേ സിൽവയാവും പറങ്കിപ്പറയുടെ ആക്രമണങ്ങൾക്ക് ചുക്കാൻ പിടിക്കുക. മധ്യനിരയിലും ടീം അഴിച്ചുപണി നടത്തിയേക്കും. ബ്രൂണോ ഫെർണാണ്ടസിനും ബെർണാണ്ടോ സിൽവയ്ക്കും വിശ്രമമനുവദിച്ച്, ഇംഗ്ലീഷ് ക്ലബ് വോൾവർഹാംപ്റ്റണിന്റെ മധ്യനിര താരങ്ങളായ റൂബൻ നെവസിനെയും, മൗടീഞ്ഞോയേയും പരിശീലകൻ സാന്റോസ് അണിനിരത്തിയേക്കും. സെർബിയയോട് നാല് ഗോളുകൾക്ക് തോറ്റ ശേഷമാണ് ഖത്തർ പോർച്ചുഗലിനെ നേരിടാൻ എത്തുന്നത്. മികച്ച ടീമിനെ തന്നെ അണിനിരത്തി മുൻയൂറോപ്യൻ ചാമ്പ്യന്മാർക്ക് വെല്ലുവിളി ഉയർത്താനാവും ഖത്തറിന്റെ പരിശ്രമം.
പോർച്ചുഗൽ സാധ്യതാ ടീം :
കോസ്റ്റ, സെമെഡോ, ഡ്വാർട്ടെ, ഡിയാസ്, മെന്റസ്, പെരേര, നെവെസ്, മൗടീഞ്ഞോ, റാഫ സിൽവ, ആന്ദ്രെ സിൽവ, ഗ്വിഡസ്
ഖത്തർ സാധ്യതാ ടീം :
അൽ-ഷീബ്, മിഗ്വേൽ, അൽ-റാവി, ഖൗഖി, സൽമാൻ, ഹസ്സൻ; മാഡിബോ, ബൗദിയാഫ്, അൽ-ഹൈദോസ്, അഫീഫ്, അലി