February 01, 2022
February 01, 2022
ദോഹ : കോവിഡ് മഹാമാരിയുടെ മൂന്നാം തരംഗം കാരണം ഏർപ്പെടുത്തിയ നിയന്ത്രണങ്ങൾ ഘട്ടം ഘട്ടമായി പിൻവലിക്കാൻ ഖത്തർ പി.എച്ച്.സി.സി തീരുമാനിച്ചു. ഫെബ്രുവരി മുതൽ ഏപ്രിൽ വരെ നീണ്ടുനിൽക്കുന്ന മൂന്ന് ഘട്ടങ്ങളിലായാണ് പ്രാഥമിക ആരോഗ്യകേന്ദ്രങ്ങളിലെ സേവനങ്ങൾ പഴയപടിയാക്കുക. 'ബാക്ക് റ്റു നോർമൽ' എന്നാണ് പദ്ധതിക്ക് പേരിട്ടിരിക്കുന്നത്.
പദ്ധതി പ്രകാരം, ഖത്തറിലെ മുഴുവൻ പ്രാഥമിക ആരോഗ്യകേന്ദ്രങ്ങളിലും അൻപത് ശതമാനം രോഗികൾക്ക് നേരിട്ടെത്തി ചികിത്സ തേടാം. ഫാമിലി മെഡിസിൻ മോഡൽ, ദന്തരോഗ വിഭാഗം തുടങ്ങി എല്ലാ പ്രത്യേക വിഭാഗങ്ങളും ഇത്തരത്തിൽ പ്രവർത്തിക്കും. സമാന്തരമായി ഓൺലൈൻ ചികിത്സയും തുടരും. ഓൺലൈനായി ചികിത്സ തേടാൻ ആഗ്രഹിക്കുന്ന രോഗികൾക്ക് അതിനുള്ള സൗകര്യം ലഭ്യമാക്കും. റൗളത്ത് അൽ ഖൈൽ ഹെൽത്ത് സെന്ററിനെ കോവിഡിനായുള്ള പ്രത്യേക കേന്ദ്രമാക്കിയ തീരുമാനം തുടരുമെന്നും, ഹെൽത്ത് സെന്ററുകളിൽ ഡ്രൈവ് ത്രൂ സ്വാബ് സർവീസ് ഉണ്ടാവുമെന്നും അധികൃതർ അറിയിച്ചു. ചികിത്സയ്ക്കായി എത്തുന്ന രോഗികൾ കോവിഡ് അനുബന്ധ മുൻകരുതലുകൾ കൃത്യമായി പാലിക്കണമെന്നും പി.എച്ച്.സി.സി അധികൃതർ അഭ്യർത്ഥിച്ചു.
