December 13, 2021
December 13, 2021
ദോഹ : ആരോഗ്യരംഗത്തെ കൂടുതൽ വിപുലീകരിക്കാനുള്ള പദ്ധതികളുമായി ഖത്തർ ആരോഗ്യമന്ത്രാലയം. രാജ്യത്ത് നിലവിലുള്ള 28 ആരോഗ്യകേന്ദ്രങ്ങൾക്ക് പുറമെ കൂടുതൽ കേന്ദ്രങ്ങൾ വൈകാതെ ആരംഭിക്കുമെന്ന് ഹെൽത്ത് കെയർ കോർപറേഷൻ അറിയിച്ചു. ഖത്തർ ന്യൂസ് ഏജൻസിയാണ് ഈ വാർത്ത പുറത്തുവിട്ടത്. കോർപറേഷന്റെ വാർഷിക റിപ്പോർട്ടിലാണ് പ്രഖ്യാപനം.
2022 ഫെബ്രുവരിയിൽ പത്താം വാർഷികം ആഘോഷിക്കാൻ ഒരുങ്ങുന്ന ഹെൽത്ത് കോർപറേഷൻ, 2019 ഏപ്രിലിൽ പ്രത്യേക പഞ്ചവത്സര പദ്ധതി ആരംഭിച്ചിരുന്നു. ഈ പദ്ധതിക്ക് കീഴിലായാണ് പുതിയ കേന്ദ്രങ്ങൾ ആരംഭിക്കുക. അൽ മഷഫ്, ഉമ്മുൽ സനീം, അൽ സദ്ദ് എന്നിവിടങ്ങളിൽ പുതിയ ആരോഗ്യകേന്ദ്രങ്ങൾ തുടങ്ങാനും, അൽ ഖോറിലെ ആരോഗ്യകേന്ദ്രം പുതിയ കെട്ടിടത്തിലേക്ക് മാറ്റാനും പദ്ധതിയുണ്ട്. ഇവ കൂടാതെ, അൽ റുവൈസ്, സൗത്ത് വക്ര എന്നിവിടങ്ങളിലെ പുതിയ ആരോഗ്യകേന്ദ്രങ്ങളുടെ ഉദ്ഘാടനവും വൈകാതെ നിർവഹിക്കപെടും.