September 12, 2021
September 12, 2021
ദോഹ: ഡിസംബറില്‍ നടക്കേണ്ട ഫിഫ ക്ലബ് ലോകകപ്പ് ആതിഥേയ പദവിയില്‍ നിന്നും ജപ്പാന്‍ പിന്‍വാങ്ങിയതോടെ ഖത്തറിന് തുടര്‍ച്ചയായി മൂന്നാം തവണയും വേദിയൊരുക്കാന്‍ വഴിയൊരുങ്ങുന്നു. കോവിഡിന്‍െറ പശ്ചാത്തലത്തിലാണ് ജപ്പാന്‍, ക്ലബ് ഫുട്ബാള്‍ ലോകകപ്പിന് വേദിയൊരുക്കാന്‍ കഴിയില്ലെന്ന് കഴിഞ്ഞ ദിവസം ഫിഫയെ അറിയിച്ചത്. ഇതോടെ, പുതിയ വേദി അന്വേഷിക്കുന്ന ലോക ഫുട്ബാള്‍ ഫെഡറേഷന് മുന്നിലെ ആദ്യ പേര് ഖത്തറാണെന്ന് സൂചന. അടുത്തവര്‍ഷത്തെ ലോകകപ്പിനുള്ള ഒരുക്കങ്ങളെല്ലാം നവംബറോടെ പൂര്‍ത്തിയാക്കുന്ന ഖത്തറിന് അനായാസം ക്ലബ് ലോകകപ്പിനും വേദിയൊരുക്കാമെന്ന പ്രതീക്ഷയിലാണ് ഫുട്ബാള്‍ ലോകം. കോവിഡ് പശ്ചാത്തലത്തില്‍ ജപ്പാനിലെ ആരോഗ്യ വകുപ്പിന്‍െറ കടുത്ത നിയന്ത്രണങ്ങള്‍ ക്ലബ് ലോകകപ്പിന്‍െറ സംഘാടനത്തെ ബാധിക്കുമെന്നാണ് ജപ്പാന്‍ അറിയിച്ചത്. പകരം വേദി എന്ന നിലയില്‍ ഖത്തറിനാണ് മുന്‍ഗണനയെന്ന് ബ്രിട്ടീഷ് പത്രമായ ഡെയ്ലി മിറര്‍ റിപ്പോര്‍ട്ട് ചെയ്യുന്നു. എല്ലാവര്‍ഷവും ഡിസംബറില്‍ നടക്കുന്ന ക്ലബ് ലോകകപ്പ്, 2020ല്‍ കോവിഡ് കാരണം മാറ്റിവെച്ചിരുന്നു. പിന്നീട്, 2021 ഫെബ്രുവരിയില്‍ ഖത്തറില്‍ വെച്ചാണ് നടന്നത്.
ആരോഗ്യ സുരക്ഷയോടെ, 30 ശതമാനം കാണികള്‍ക്ക് പ്രവേശനം നല്‍കിയായിരുന്നു ടൂര്‍ണമെന്‍റ് നടന്നത്. ജര്‍മന്‍ ക്ലബ് ബയേണ്‍ മ്യുണിക് ജേതാക്കളായി. 2019 സീസണിലെ ലോകകപ്പിനും ഖത്തറായിരുന്നു വേദി. അതേസമയം, നവംബര്‍ 30 മുതല്‍ ഡിസംബര്‍ 18 വരെ ഖത്തറിലെ ലോകകപ്പ് വേദികളില്‍ ഫിഫ അറബ് കപ്പ് നടക്കുന്നതിനാല്‍ ക്ലബ് ലോകകപ്പില്‍ തീയതി മാറ്റം അനിവാര്യമാവും. അറബ് കപ്പ് മത്സരങ്ങള്‍ കഴിഞ്ഞ ശേഷം മാത്രമേ ഖത്തറിന് ക്ലബ് ലോകകപ്പിന് വേദിയൊരുക്കാന്‍ കഴിയൂ.
