February 26, 2022
February 26, 2022
ദോഹ : ഖത്തറിലെ വൈദ്യുതി - ജലബില്ലുകളുടെ പണം എളുപ്പത്തിൽ അടക്കാൻ വഴിയൊരുങ്ങുന്നു. കൊമേർഷ്യൽ ബാങ്ക് ഓഫ് ഖത്തറുമായി (സി.ബി.ക്യു) സഹകരിച്ച് ഓൺലൈൻ പണമടക്കലിന് പുതിയ പദ്ധതി ഒരുക്കിയതായി കഹ്റാമ അറിയിച്ചു. പുതിയ രീതിയിലൂടെ, ഓരോമാസവും ബില്ലിന്റെ തുക ഓട്ടോമാറ്റിക്ക് ആയി അകൗണ്ടിൽ നിന്നും പിൻവലിക്കുമെന്ന് കഹ്റാമ വിശദമാക്കി. ജനങ്ങൾക്ക് ഇതുവഴി ഏറെ സമയം ലഭിക്കാമെന്നും, ബിൽ തുകയുടെ കളക്ഷൻ കൂടുതൽ സുഗമമാവുമെന്നും കഹ്റാമ ഫൈനാൻഷ്യൽ ഡയറക്ടർ ജാബിർ ഹമദ് അൽ നാബിദ് അഭിപ്രായപ്പെട്ടു.
ഈ സേവനം ലഭ്യമാവാനായി ഒരൊറ്റ തവണ മാത്രമാണ് കഹ്റാമയിലൂടെ അനുമതി നൽകേണ്ടത്. പിന്നീട് ബില്ലടയ്ക്കാൻ സമയമായാൽ ഓട്ടോമാറ്റിക്ക് ആയി കഹ്റാമക്ക് ബാങ്ക് അകൗണ്ടിൽ നിന്നും തുക ഈടാക്കാൻ കഴിയും. 'ഡയറക്ട് ഡെബിറ്റ് സർവീസ് ' എന്നാണ് ഈ സേവനത്തിന് പേര് നൽകിയിരിക്കുന്നത്. സി.ബി.ക്യു ബാങ്കിന്റെ ഉപഭോക്താക്കൾക്കും, മറ്റ് ബാങ്കുകളിൽ അകൗണ്ട് ഉള്ളവർക്കും സേവനം ലഭ്യമാകുമെന്ന് കഹ്റാമ അറിയിച്ചു. സി.ബി.ക്യു ബാങ്കിൽ അകൗണ്ട് ഉള്ളവർക്ക് ബാങ്കിന്റെ മൊബൈൽ അപ്ലികേഷൻ ഉപയോഗിച്ചും സേവനത്തിന് രജിസ്റ്റർ ചെയ്യാൻ കഴിയും.