April 12, 2022
April 12, 2022
ടെഹ്‌റാൻ : ഖത്തർ ഗതാഗത മന്ത്രി ജാസിം സെയ്ഫ് അഹ്മദ് അൽ സുലൈത്തിയും, ഇറാൻ നഗരകാര്യ മന്ത്രി റുസ്തം ഗാസെമിയും കൂടിക്കാഴ്ച്ച നടത്തി. ഖത്തറിന് പുതുതായി അനുവദിക്കപ്പെട്ട ദോഹ ഫ്ലൈറ്റ് ഇൻഫോർമേഷൻ റീജിയനും, ഇറാന്റെ ടെഹ്‌റാൻ ഫ്ലൈറ്റ് ഇൻഫോർമേഷൻ റീജിയനും തമ്മിലുള്ള സഹകരണത്തെ പറ്റിയുള്ള നയതന്ത്ര കരാറിൽ ഇരുമന്ത്രിമാരും ഒപ്പുവെച്ചു. ഇരുരാജ്യങ്ങൾക്കും ഇടയിലെ വിമാനസർവീസുകളുടെ എണ്ണം വർധിപ്പിക്കാനും ധാരണയായി.
നവംബറിൽ നടക്കുന്ന ഫുട്‍ബോൾ ലോകകപ്പിനെ മുൻനിർത്തി, ഗതാഗതവുമായി ബന്ധപ്പെട്ട കാര്യങ്ങളാണ് ചർച്ചയിൽ വിഷയമായത്. നേരത്തെ, ലോകകപ്പിന്റെ മുന്നൊരുക്കങ്ങളിൽ ഇറാൻ ഖത്തറിന് സഹായം വാഗ്ദാനം ചെയ്തിരുന്നു. രണ്ട് രാജ്യങ്ങളിലെയും ഗതാഗത വകുപ്പിലെ ഉന്നത ഉദ്യോഗസ്ഥർ ചർച്ചയുടെ ഭാഗമായി. നിലവിലുള്ള നിയന്ത്രണങ്ങൾ എടുത്തുമാറ്റി, കടൽ മാർഗമുള്ള ചരക്കുനീക്കം സുഗമമാക്കാനും, തുറമുഖങ്ങൾക്കിടയിൽ കൂടുതൽ സഹകരണത്തോടെ പ്രവർത്തിക്കാനും ഇറാനും ഖത്തറും തീരുമാനിച്ചു.
